መዝሙር 17
መዝሙራት ዘዳዊት ምዕራፍ ፲፯ መዝሙር ዘዳዊት።
፩ እግዚኦ ስምዐኒ ጽድቅየ ወአፅምአኒ ስእለትየ።
፪ ወአፅምአኒ ጸሎትየ፤ ዘኢኮነ በከናፍረ ጕሕሉት።
፫ እምቅድመ ገጽከ ይወፅእ ፍትሕየ፤ አዕይንትየኒ ርእያ ጽድቅከ።
፬ ሐወጽከኒ ሌሊተ ወፈተንኮ ለልብየ ወአመከርከኒ ወኢተረክበ ዐመፃ በላዕሌየ።
፭ ከመ ኢይንብብ አፉየ ግብረ እጓለ እመሕያው በእንተ ቃለ ከናፍሪከ፤
፮ አነ ዐቀብኩ ፍናወ ዕፁባተ። አጽንዖን ለመካይድየ ውስተ ፍኖትከ፤ ከመ ኢይድኀፃ ሰኰናየ።
፯ አንሰ ጸራኅኩ እስመ ሰምዐኒ እግዚአብሔር፤ አፅምእ እዝነከ ኀቤየ ወስምዐኒ ቃልየ።
፰ ሰብሓ ለምሕረትከ ዘያድኅኖሙ ለእለ ይትዌከሉከ፤ እምእለ ይትቃወምዋ ለየማንከ።
፱ ዕቀበኒ ከመ ብንተ ዐይን፤ ወበጽላሎተ ክንፊከ ክድነኒ። እምገጸ ኃጥኣን እለ ያኀስሩኒ፤
፲ ጸላእትየሰ አስተሐየጽዋ ለነፍስየ። ወቈጸሩ አማዑቶሙ፤ ወነበበ ትዕቢተ አፉሆሙ።
፲፩ ሰደዱኒ ይእዜኒ ዐገቱኒ፤ ወአትሐቱ አዕይንቲሆሙ ውስተ ምድር።
፲፪ ወተመጠዉኒ ከመ አንበሳ ዘጽኑሕ ለመሲጥ፤ ወከመ እጓለ አንበሳ ዘይነብር ተኀቢኦ።
፲፫ ተንሥአ እግዚኦ በጽሖሙ ወአዕቅጾሙ፤ ወበልሓ እምኲናት ለነፍስየ። ሰይፍከ ላዕለ ፀረ እዴከ፤
፲፬ እግዚኦ እምውኁዳን ምድር ንፍቆሙ በሕይወቶሙ፤ እምኅቡኣቲከ ጸግበት ከርሦሙ።
፲፭ ጸግቡ ደቂቆሙ ወኀደጉ ትራፋቲሆሙ ለሕፃናቲሆሙ።
፲፮ ወአንሰ በጽድቅከ እሬኢ ገጸከ፤ ወእጸግብ በርእየ ስብሐቲከ።