መዝሙር 29
መዝሙራት ዘዳዊት ምዕራፍ ፳፱ መዝሙር ዘዳዊት ዘበፀአት ትዕይንት።
፩ አምጽኡ ለእግዚአብሔር ውሉደ አማልክት፤ አምጽኡ ለእግዚአብሔር እጓለ ሐራጊት፤
፪ አምጽኡ ለእግዚአብሔር ክብረ ወስብሐተ። አምጽኡ ለእግዚአብሔር ስብሐተ ለስሙ፤ ስግዱ ለእግዚአብሔር በዐጸደ መቅደሱ።
፫ ቃለ እግዚአብሔር ላዕለ መየት። አምላከ ስብሐት አንጐድጐደ፤ እግዚአብሔር ላዕለ ማያት ብዙኅ።
፬ ቃለ እግዚአብሔር በኀይል፤ ቃለ እግዚአብሔር በዐቢይ ስብሐት።
፭ ቃለ እግዚአብሔር ይቀጠቅጥ አርዘ፤ ወይቀጠቅጦ እግዚአብሔር ለአርዘ ሊባኖስ።
፮ ወያደገድጎ ከመ ላህመ ለሊባኖስ፤ ወፍቁርሰ ከመ ወልድ ዘአሐዱ ቀርኑ።
፯ ቃለ እግዚአብሔር ይመትር ነደ እሳት። ቃለ እግዚአብሔር ያድለቀልቆ ለገዳም፤ ወያድለቀልቆ እግዚአብሔር ለሐቅለ ቃዴስ።
፰ ቃለ እግዚአብሔር ያጸንዖሙ ለኀየላት፤ ወይከሥት አዕዋመ፤ ወበጽርሑ ኵሉ ይብል ስብሐት።
፱ እግዚአብሔር ያስተጋብኦ ለማየ አይኅ፤ ወይነብር እግዚአብሔር ወይነግሥ ለዓለም።
፲ ወይሁቦሙ እግዚአብሔር ኀይል ለሕዝቡ፤ እግዚአብሔር ይባርኮሙ ለሕዝቡ በሰላም።