መዝሙር 32
መዝሙራት ዘዳዊት ምዕራፍ ፴፪ መዝሙር ዘዳዊት ዘበኣእምሮ።
፩ ብፁዓን እለ ተኀድገ ሎሙ ኀጢአቶሙ፤ ወለእለ ኢሐሰበ ሎሙ ኵሎ ገጋዮሙ።
፪ ብፁዕ ብእሲ ዘኢኈለቈ ሎቱ እግዚአብሔር ኃጢአቶ፤ ወዘአልቦ ጽልሑተ ውስተ ልቡ።
፫ እስመ አርመምኩ በልብየ አዕጽምትየ፤ እምኀበ እጸርኅ ኵሎ አሚረ።
፬ እስመ መዐልተ ወሌሊተ ከብደት እዴከ ላዕሌየ፤ ወተመየጥኩ ለሕርትምና ሶበ ወግዐኒ ሦክ።
፭ ኃጢአትየ ነገርኩ ወአበሳየ ኢኀባእኩ፤
፮ ወእቤ ኣስተዋዳ ርእስየ ኀበ እግዚአብሔር በእንተ ኀጢአትየ፤ ወአንተ ኅድግ ጽልሑቶ ለልብየ።
፯ በእንተዝ ይጼሊ ኀቤከ ኵሉ ጻድቅ በጊዜ ርቱዕ፤
፰ ወባሕቱ ማየ አይኅ ብዙኅ ኢይቀርብ ኀቤከ።
፱ አንተ ምስካይየ እምዛቲ ምንዳቤየ እንተ ረከበትኒ፤ ወትፍሥሕትየኒ ከመ ታድኅነኒ እምእለ ሮዱኒ።
፲ ኣሌብወከ ወኣጸንዐከ በዛቲ ፍኖት እንተ ሖርከ፤ ወኣጸንዕ አዕይንትየ ላዕሌከ።
፲፩ ኢትኩኒ ከመ ፈረስ ወበቅል እለ አልቦሙ ልበ፤
፲፪ እለ በሕሳል ወበልጓም ይመይጥዎሙ መላትሒሆሙ ከመ ኢይቅረቡ ኀቤከ።
፲፫ ብዙኅ መቅሠፍቶሙ ለኃጥኣን፤ ወእለሰ ይትዌከሉ በእግዚአብሔር ሣህል ይሜግቦሙ።
፲፬ ተፈሥሑ በእግዚአብሔር ወተሐሠዩ ጻድቃኑ፤ ወተመክሑ ኵልክሙ ርቱዓነ ልብ።