መዝሙር 49
መዝሙራት ዘዳዊት ምዕራፍ ፵፱ ፍጻሜ ዘደቂቀ ቆሬ መዝሙር ዘዳዊት።
፩ ስምዑ ዝንተ ኵልክሙ አሕዛብ፤ ወአፅምኡ ኵልክሙ እለ ትነብሩ ውስተ ዓለም።
፪ በበ በሐውርቲክሙ ደቂቀ እጓለ እመሕያው፤ አብዕልትኒ ወነዳይኒ።
፫ አፉየ ይነግር ጥበበ፤ ወሕሊና ልብየ ምክረ።
፬ ኣፀምእ ምሳሌ በእዘንየ፤ ወእከሥት በመዝሙር ነገርየ።
፭ ለምንት እፈርህ እምዕለት እኪት፤ ኃጢአተ ሰኰናየ ዐገተኒ።
፮ እለ ይትአመኑ በኀይሎሙ፤ ወይዜሀሩ በብዝኀ ብዕሎሙ።
፯ እኍኒ ኢያድኅን እኅዋሁ ወኢያድኅን ሰብእ፤ ወኢይሁብ ለእግዚአብሔር ቤዛሁ።
፰ ወኢተውላጠ ሤጠ ነፍሱ ዘጻመወ ለዓለም
፱ የሐዩ ለዝሉፉ፤ እስመ ኢይሬኢ መስና። ሶበ ትሬእዮሙ ለጠቢባን ይመውቱ
፲ መከማሁ ይትሐጐሉ አብዳን እለ አልቦሙ ልበ፤ ወየኀድጉ ለባዕድ ብዕሎሙ።
፲፩ ወመቃብሪሆሙ አብያቲሆሙ ለዓለም ወማኅደሪሆሙ ለትውልደ ትውልድ፤ ወይሰምዩ አስማቲሆሙ በሐውርቲሆሙ።
፲፪ ወሰብእሰ እንዘ ክቡር ውእቱ ኢያእመረ፤ ወኮነ ከመ እንስሳ ዘአልቦ ልበ ወተመሰሎሙ።
፲፫ ለሊሃ ፍኖቶሙ ዕቅፍቶሙ ወእንዘ ይሠምሩ በአፉሆሙ።
፲፬ ከመ አባግዕ ሞት ይሬዕዮሙ በሲኦል፤
፲፭ ወይቀንይዎሙ ራትዓን በጽባሕ ወትበሊ ረድኤቶሙ በሲኦል እምክብሮሙ።
፲፮ ወባሕቱ እግዚአብሔር ያድኅና ለነፍስየ እምእደ ሲኦል፤ ሶበ ይነሥኡኒ።
፲፯ ኢትፍርሆ ለሰብእ ሶበ ይብዕል፤ ወሶበ ይበዝኅ ክብረ ቤቱ።
፲፰ እስመ ኢይነሥእ መስሌሁ ኵሎ እመ ይመውት፤ ወኢይወርድ መስሌሁ ክብረ ቤቱ።
፲፱ እስመ ፈግዐት ነፍሱ በሕይወቱ፤ የአምነከ ሰብእ ሶበ ታሤኒ ሎቱ።
፳ ወይወርድ ውስተ ዓለመ አበዊሁ፤ ወኢይሬኢ እንከ ብርሃነ እስከ ለዓለም።
፳፩ ወእጓለ እመሕያውሰ እንዘ ክቡር ውእቱ ኢያእምረ፤ ወኮነ ከመ እንስሳ ዘአልቦ ልበ ወተመሰሎሙ።