መዝሙር 66
መዝሙራት ዘዳዊት ምዕራፍ ፷፮ ፍጻሜ ማኅሌት መዝሙር ዘትንሣኤ።
፩ የብቡ ለእግዚአብሔር በኵሉ ምድር። ወዘምሩ ለስሙ፤ ሀቡ አኰቴተ ለስብሐቲሁ።
፪ በልዎ ለእግዚአብሔር ግሩም ግብርከ እንዘ ብዙኅ ኀይልከ ሐሰዉክ ጸላእቲከ።
፫ ኵላ ምድር ትሰግድ ወትገኒ ለከ ወትዜምር ለስምከ ልዑል።
፬ ንዑ ወትርአዩ ግብሮ ለእግዚአብሔር፤ ግሩም ምክሩ እምእጓለ እመሕያው።
፭ ዘይሬስያ ለባሕር የብሰ ወበተከዚ የኀልፉ በእግር፤ ወበህየ ንትፌሣሕ ኅቡረ።
፮ ዘይኴንን በኀይሉ ዘለዓለም ወአዕይንቲሁኒ ኀበ አሕዛብ ይኔጽራ፤ እለ ታአምሩ ኢታዕብዩ ርእሰክሙ።
፯ ባርክዎ አሕዛብ ለአምላክነ፤ ወአፅምኡ ቃለ ስብሐቲሁ።
፰ ዘአንበራ ለነፍስየ ውስተ ሕይወት፤ ወኢይሁቦን ሁከተ ለእግርየ።
፱ እስመ አምከርከነ እግዚኦ፤ ወፈተንከነ ከመ ይፈትንዎ ለብሩር።
፲ ወአባእከነ ውስተ መሥገርት፤ ወአምጻእከ ሕማመ ቅድሜነ። ወአጽአንከ ስብአ ዲበ አርእስቲነ፤
፲፩ አኅለፍከነ ማእከለ እሳት ወማይ ወአውፃእከነ ውስተ ዕረፍት።
፲፪ እበውእ ቤተከ ምስለ መባእየ፤ ወእሁብ ብፅአትየ።
፲፫ ዘነበብኩ በአፉየ፤ ዘእቤ በከናፍርየ አመ ምንዳቤየ።
፲፬ መሥዋዕተ ንጹሐ ዘአልቦ ነውረ ኣበውእ ለከ ዕጣነ ምስለ ሕራጊት፤ እሠውዕ ለከ አልህምተ ወአጣሌ።
፲፭ ንዑ ስምዑኒ ወእንግርክሙ ኵልክሙ እለ ትፈርህዎ ለእግዚአብሔር፤ መጠነ ገብረ ላቲ ለነፍስየ።
፲፮ ዘጸራኅኩ ኀቤሁ በአፉየ፤ ወከላሕኩ በልሳንየ።
፲፯ እስመ ዐመፃ ይሬኢ ውስተ ልብየ፤ ኢይሰምዐኒ እግዚአብሔር።
፲፰ ወበእንተዝ ሰምዐኒ እግዚአብሔር፤ ወአፅምአኒ ቃለ ስእለትየ።
፲፱ ይትባረክ እግዚአብሔር ዘኢከልአኒ ጸሎትየ ወኢያርሐቀ ሣህሎ እምኔየ።