መዝሙር 71
መዝሙራት ዘዳዊት ምዕራፍ ፸፩ ዘዳዊት ዘወልደ አሚናዳብ ለእለ አቅደሙ ተፄውዎ።
፩ ኪያከ ተወከልኩ እግዚኦ ወኢይትኀፈር ለዓለም። ወበጽድቅከ አንግፈኒ ወባልሐኒ፤
፪ አፅምእ እዝነከ ኀቤየ ወፍጡነ አድኅነኒ።
፫ ኩነኒ አምላኪየ ወመድኀንየ ውስተ ብሔር ጽኑዕ ከመ ታድኅነኒ፤
፬ እስመ ኀይልየ ወጸወንየ አንተ።
፭ አምላኪየ አድኅነኒ እምእደ ኃጥኣን፤ ወእምእደ ዐመፂ ወገፋዒ።
፮ እስመ አንተ ተስፋየ እግዚኦ፤ እግዚእየ ተሰፈውኩከ እምንእስየ።
፯ ወብከ ጸናዕኩ በውስተ ከርሠ እምየ። ወበውስተ ማኅፀን እንተ ከደንከኒ።
፰ ወአንተ ዝክርየ በኵሉ ጊዜ። ከመ ኳሄላ ኮንክዎሙ ለብዙኃን። ወአንተ ረዳእየ ወኀይልየ።
፱ ምላእ አፉየ ስብሐቲከ፤ ከመ እሴብሕ አኰቴተከ ወኵሎ አሚረ ዕበየ ስብሐቲከ።
፲ ኢትግድገኒ በመዋዕለ ርሥእየ፤ ወአመሂ ኀልቀ ኀይልየ ኢትኅድገኒ አምላኪየ።
፲፩ እስመ ነበቡ ላዕሌየ ጸላእትየ፤ ወእለሂ የኀሥዋ ለነፍስየ ተማከሩ ኅቡረ
፲፪ ወይቤሉ ኀደጎ እግዚአብሔር፤ ዴግንዎ ወትእኅዝዎ፤ እስመ አልቦ ዘያድኅኖ።
፲፫ አምላኪየ ኢትርሐቅ እምኔየ፤ አምላኪየ ነጽር ውስተ ረዲኦትየ።
፲፬ ይትኀፈሩ ወይኅሰሩ እለ ያስተዋድይዋ ለነፍስየ፤ ወይልበሱ ኀፍረተ ወኀሳረ እለ ይፈቅዱ ሊተ ሕማመ።
፲፭ ወአንሰ ዘልፈ እሴፈወከ እግዚኦ፤ ወእዌስክ ዲበ ኵሉ ስብሐቲከ።
፲፮ አፉየ ይነግር ጽድቀከ ወኵሎ አሚረ አድኅኖተከ፤
፲፯ እስመ ኢያአምር ተግባረ። እበውእ በኀይለ እግዚአብሔር፤ እግዚኦ እዜከር ጽድቀከ ባሕቲቶ።
፲፰ ወመሀርከኒ አምላኪየ እምንእስየ፤ እስከ ይእዜ እነግር ስብሐቲከ።
፲፱ ወእስከ እልህቅ ወእረሥእ ኢትኅድገኒ አምላኪየ፤
፳ እስከ እነግረ መዝራዕተከ ለትውልድ ዘይመጽእ።
፳፩ ኀይለከኒ ወጽድቀከኒ። እግዚኦ እስከ አርያም ገበርከ ዐቢያተ። እግዚኦ መኑ ከማከ።
፳፪ እስመ አርአይከኒ ሕማመ ወምንዳቤ ብዙኀ፤ ወተመየጥከኒ ወአሕየውከኒ፤ ወእምቀላየ ምድር ካዕበ አውፃእከኒ።
፳፫ ወአብዛኅኮ ለጽድቅከ ወገባእከ ታስተፌሥሐኒ፤ ወእምቀላየ ምድር ካዕበ አውፃእከኒ።
፳፬ ወአነሂ እገኒ ለከ በንዋየ መዝሙር ለጽድቅከ፤ እዜምር ለከ አምላኪየ በመሰንቆ ቅዱሰ እስራኤል።
፳፭ ይትፌሥሓኒ ከናፍርየ ሶበ እዜምር ለከ፤ ወለነፍስየኒ አንተ አድኀንካ።
፳፮ ወዓዲ ልሳንየ ያነብብ ጽድቀከ ኵሎ አሚረ፤ ሶበ ተኀፍሩ ወኀስሩ እለ የኀሡ ሊተ እኩየ።