መዝሙር 72
መዝሙራት ዘዳዊት ምዕራፍ ፸፪ በአንተ ሰሎሞን።
፩ እግዚኦ ኵነኔከ ሀቦ ለንጉሥ፤ ወጽድቅከኒ ለወልደ ንጉሥ።
፪ ከመ ይኰንኖሙ ለሕዝብከ በጽድቅ፤ ወለነዳያኒከ በፍትሕ።
፫ ይትወከፉ አድባር ወአውግር ሰላመ ሕዝብከ።
፬ ኰንን በጽድቅ ነዳያነ ሕዝብከ ወአድኅኖሙ ለደቂቀ ምስኪናኒከ፤ ወአኅስሮ ለዕቡይ።
፭ ወይጽናሕ ምስለ ፀሐይ፤ እምቅድመ ወርኅ ለትውልደ ትውልድ።
፮ ወይወርድ ከመ ጠል ውስተ ፀምር፤ ወከመ ነጠብጣብ ዘያንጠበጥብ ዲበ ምድር።
፯ ወይሠርጽ ጽድቅ በመዋዕሊሁ፤ ወብዙኅ ሰላመ እስከ ይኀልፍ ወርኅ።
፰ ወይኴንን እምባሕር እስከ ባሕር፤ ወእምአፍላግ እስከ አጽናፈ ዓለም።
፱ ይገንዩ ቅድሜሁ ኢትዮጵያ፤ ወጸላእቲሁ ሐመደ ይቀምሑ።
፲ ነገሥተ ተርሴስ ወደሰያት አምኃ ያበውኡ፤ ነገሥተ ሳባ ወዐረብ ጋዳ ያመጽኡ።
፲፩ ወይሰግዱ ሎቱ ኵሎሙ ነገሥተ ምድር፤ ወይትቀነዩ ሎቱ ኵሎሙ አሕዛብ።
፲፪ እስመ አድኀኖ ለነዳይ እምእደ ዘይትዔገሎ፤ ለምስኪን ዘአልቦ ረዳኤ።
፲፫ ወይምሕክ ነዳየ ወምስኪነ፤ ወያድኅን ነፍሰ ነዳያን።
፲፬ እምርዴ ወእምትዕግልት ያድኅና ለነፍሶሙ፤ ወክቡር ስሙ በቅድሜሆሙ።
፲፭ ወየሐዩ ወይሁብዎ እምወርቀ ዐረብ፤ ወዘልፈ ይጼልዩ በእንቲአሁ ወኵሎ አሚረ ይድሕርዎ።
፲፮ ወይከውን ምስማከ ለኵሉ ምድር ውስተ አርእስተ አድባር፤ ወኡነውኅ እምአርህ ፍሬሁ ወይበቍል ውስተ ሀገር ከመ ሣዕረ ምድር።
፲፯ ወይከውን ቡሩከ ስሙ ለዓለም እምቅድመ ፀሐይ ሀሎ ስሙ፤
፲፰ ወይትባረኩ ቦቱ ኵሎሙ አሕዛበ ምድር ወያስተበፅእዎ ኵሎሙ ሕዝብ።
፲፱ ይትባረክ እግዚአብሔር አምላከ እስራኤል፤ ዘገብረ መንክረ ባሕቲቱ።
፳ ወይትባረክ ስመ ስብሓቲሁ ልዓለም ወለዓለመ ዓለም፤ ወይምላእ ስብሐቲሁ ኵሎ ምድር፤ ለይኩን ለይኩን። ኀልቀ መኅልይ ዘዳዊት ዘወልደ ኤሳይ።