መዝሙር 79
መዝሙራት ዘዳዊት ምዕራፍ ፸፱ መዝሙር ዘአሳፍ።
፩ እግዚኦ ቦኡ አሕዛብ ውስተ ርስትከ ወአርኰሱ ጽርሐ መቅደስከ፤ ወረሰይዋ ለኢየሩሳሌም ከመ ልገተ ዐቃቤ ቀምሕ።
፪ ወረሰዩ አብድንቲሆሙ ለአግብርቲከ መብልዖሙ ለአዕዋፈ ሰማይ፤ ወሥጋሆሙኒ ለጻድቃኒከ ለአረዊተ ገዳም።
፫ ከዐዉ ደሞሙ ከመ ማይ ዐውዳ ለኢየሩሳሌም፤ ወኀጥኡ ዘይቀብሮሙ።
፬ ወኮነ ጽእለተ ለጎርነ፤ ሣሕቀ ወስላቀ ለአድያሚነ።
፭ እስከ ማእዜኑ እግዚኦ ትትመዓዕ ለዝሉፉ፤ ወይነድድ ከመ እሳት ቅንአትከ።
፮ ከዐው መዐተከ ላዕለ አሕዛብ እለ ኢያአምሩከ፤ ወላዕለ መንግሥት እንተ ኢጸውዐት ስመከ።
፯ እስመ በልዕዎ ለያዕቆብ፤ ወአማሰኑ ብሔሮ።
፰ ኢትዝክር ለነ አበሳነ ዘትካት፤ ፍጡነ ይርከበነ ሣህልከ እግዚኦ፤ እስመ ተመንደብነ ፈድፋደ።
፱ ርድአነ አምላክነ ወመድኀኒነ በእንተ ስብሐተ ስምከ፤ እግዚኦ ባልሐነ ወስረይ ኀጢአተነ በእንተ ስምከ።
፲ ከመ ኢይበሉነ አሕዛብ አይቴ ውእቱ አምላኮሙ። ወይርአዩ አሕዛብ በቅድመ አዕይንቲነ
፲፩ በቀለ ደሞሙ ለአግብርቲከ ዘተክዕወ። ይባእ ቅድሜከ ገዐሮሙ ለሙቁሓን፤
፲፪ ወበከመ ዕበየ መዝራዕትከ ተሣሀሎሙ ለደቂቀ ቅቱላን።
፲፫ ፍድዮሙ ለጎርነ ምስብዒተ ውስተ ሕፅኖሙ፤ ትዕይርቶሙ ዘተዐየሩከ እግዚኦ።
፲፬ ወንሕነሰ ሕዝብከ ወአባግዐ መርዔትከ ንገኒ ለከ ለዓለም።
፲፭ ወንነግር ስብሐቲከ ለትውልደ ትውልድ።