መዝሙር 90
መዝሙራት ዘዳዊት ምዕራፍ ፺ ጸሎት ዘሙሴ ዘብእሴ እግዚአብሔር።
፩ እግዚኦ ጸወነ ኮንከነ ለትውልደ ትውልድ።
፪ ዘእንበለ ይቁም አድባር ወይትፈጠር ዓለም ወምድር፤ እምቅድመ ዓለም ወእስከ ለዓለም አንተ ክመ።
፫ ኢትሚጦ ለሰብእ ለኀሳር፤ ወትቤ ተመየጡ ደቂቀ እጓለ እመሕያው።
፬ እስመ ዐሠርቱ ምእት ዐመት በቅድሜከ ከመ ዕለት እንተ ትማልም ኀለፈት፤
፭ ወሰዓተ ሌሊት። ምኑን ዐመታት በቅድሜሆሙ፤
፮ በጽባሕ ከመ ሣዕር የኀልፍ። በጽባሕ ይሠርጽ ወየኀልፍ፤ ወሰርከሰ ይወድቅ የቢሶ ወአንፂዎ።
፯ እስመ ኀለቅነ በመዐትከ፤ ወደንገፅነ በመቅሠፍትከ።
፰ ወሤምከ ኀጢአተነ ቅድሜከ፤ ወዓለምነሂ ውስተ ብርሃነ ገጽከ።
፱ እስመ ኀልቃ ኵሎን መዋዕሊነ ወኀለቅነ በመቅሠፍትከ።
፲ ወዐመቲነኒ ከመ ሳሬት ይከውና። ወመዋዕለ ዐመቲነ ሰብዓ ክራማት
፲፩ ወእመሰ በዝኃ ሰማንያ ዓም፤ ወፈድፋድንሰ እምእላ ጻማ ወሕማም።
፲፪ እስመ ኀለፈት የዋሃት እምኔነ ወተገሠጽነ።
፲፫ መኑ ያአምር ኀይለ መቅሠፍትከ፤ ወእምግርማ መዐትከ ኀልቁ።
፲፬ ከመዝ አርኢ የማነከ፤ ለምሁራን ልብ በጥበብ።
፲፭ ተመየጥ እግዚኦ እስከ ማእዜኑ፤ ወተናበብ በእንተ አግብርቲከ።
፲፮ እስመ ጸገብነ በጽባሕ ምሕረተከ፤ ወተፈሣሕነ ወተሐሠይነ በኵሉ መዋዕሊነ፤
፲፯ ወተፈሣሕነ ህየንተ መዋዕል ዘኣሕመምከነ፤ ወህየንተ ዐመት እንተ ርኢናሃ ለእኪት።
፲፰ ርኢ ላዕለ አግብርቲከ ወላዕለ ተግባርከ እግዚኦ፤ ወምርሖሙ ለደቂቆሙ።
፲፱ ለይኩን ብርሃኑ ለእግዚአብሔር አምላክነ ላዕሌነ፤
ወይሠርሕ ለነ ተግባረ እደዊነ ወይሠርሕ ተግባረ እደዊነ።