መዝሙር 97
መዝሙራት ዘዳዊት ምዕራፍ ፺፯ ዘዳዊት ዘአመ ገብአ ምድሩ።
፩ እግዚአብሔር ነግሠ ትትሐሠር ምድር፤ ወይትሐሥያ ደሰያት ብዙኃት።
፪ ደመና ወቆባር ዐውዶ፤ ፍትሕ ወርትዕ ተድላ መንበሩ።
፫ እሳት ይሐውር ቅድሜሁ፤ ወነድ የዐግቶሙ ለጸላእቱ።
፬ አስተርአየ መባርቅቲሁ ለዓለም፤ ርእየት ወአድለቅለቀት ምድር።
፭ ወአድባርኒ ተመሰዉ ከመ ስምዕ እምቅድመ ገጹ ለእግዚአብሔር፤ እምቅድመ ገጹ ለእግዚአብሔር ኵላ ምድር።
፮ ይነግራ ሰማያት ጽድቀ ዚአሁ፤ ወኵሎሙ አሕዛብ ርእዩ ስብሐቲሁ።
፯ ይትኀፈሩ ኵሎሙ እለ ይሰግዱ ለግልፎ፤ እለ ይትሜክሑ በአማልክቲሆሙ፤
፰ ወይስግዱ ሎቱ ኵሎሙ መላእክቲሁ። ሰምዐት ወተፈሥሐት ጽዮን
፱ ወተሐሥያ አዋልደ ይሁዳ፤ በእንተ ፍትሕከ እግዚኦ።
፲ እስመ አንተ እግዚአብሔር ልዑል በኵሉ ምድር፤ ፈድፋደ ተለዐልከ እምኵሉ አማልክት።
፲፩ እለ ታፈቅርዎ ለእግዚአብሔር ጽልእዋ ለእኪት፤ የዐቅብ እግዚአብሔር ነፍሰ ጻድቃኑ ወያድኅኖሙ እምእደ ኃጥኣን።
፲፪ በርህ ሠረቀ ለጻድቃን፤ ወለርቱዓነ ልብ ትፍሥሕት።
፲፫ ይትፌሥሑ ጻድቃን በእግዚአብሔር፤ ወይገንዩ ለዝክረ ቅድሳቱ።