መዝሙር 103
መዝሙራት ዘዳዊት ምዕራፍ ፻፫ ዘዳዊት።
፩ ተባርኮ ነፍስየ ለእግዚአብሔር፤ ወኵሉ አዕጽምትየ ለስሙ ቅዱስ።
፪ ተባርኮ ነፍስየ ለእግዚአብሔር፤ ወኢትርሳዕ ኵሎ ሰብሐቲሁ።
፫ ዘይሰሪ ለከ ኵሎ ኃጢአትከ፤ ዘይፌውሰከ እምኵሉ ደዌከ።
፬ ዘያድኅና እሙስና ለሕይወትከ፤ ዘይኬልለከ በሣህሉ ወበምሕረቱ።
፭ ዘያጸግባ እምበረከቱ ለፍትወትከ፤ ዘይሔድሳ ከመ ንስር ለውርዙትከ።
፮ ገባሬ ሣህል እግዚአብሔር፤ ወይፈትሕ ለኵሉ ግፉዓን።
፯ አርአየ ፍናዊሁ ለሙሴ፤ ወለደቂቀ እስራኤል ሥምረቶ።
፰ መሓሪ ወመስተሣህል እግዚአብሔር፤ ርሑቀ መዐት ወብዙኀ ምሕረት ወጻድቅ።
፱ ኢይቀሥፍ ወትረ ወኢይትመዓዕ ዘልፈ።
፲ አኮ በከመ ኀጢአትነ ዘገብረ ለነ፤ ወኢፈደየነ በከመ አበሳነ።
፲፩ ወበከመ ልዑል ሰማይ እምድር፤ አጽንዐ ምሕረቶ እግዚአብሔር ላዕለ እለ ይፈርህዎ።
፲፪ ወበከመ ይርሕቅ ሠርቅ እምዐረብ፤ አርሐቀ እምኔነ ኀጢአተነ።
፲፫ ወበከመ ይምሕር አብ ውሉደ፤ ከማሁ ይምሕሮሙ እግዚአብሔር ለእለ ይፈርህዎ። እስመ ውእቱ ያአመር ፍጥረተነ፤
፲፬ ተዘከር እግዚኦ ከመ መሬት ንሕነ። ወሰብእሰ ከመ ሣዕር መዋዕሊሁ፤ ወከመ ጽጌ ገዳም ከማሁ ይፈሪ።
፲፭ እስመ መንፈስ ይወፅእ እምኔሁ ወኢይሄሉ እንከ፤ ወኢያአምር እንከ መካኖ።
፲፮ ወሣህሉሰ ለእግዚአብሔር እምዓለም ወእስከ ለዓለም ዲበ እለ ይፈርህዎ፤
፲፯ ወጽድቁኒ ዲበ ትውልደ ትውልድ። ለእለ የዐቅቡ ሕጎ፤
፲፰ ወይዜከሩ ትእዛዞ ከመ ይግበሩ።
፲፱ እግዚአብሔር አስተዳለወ መንበሮ በሰማያት፤ ወኵሎ ይኴንን በመንግሥቱ።
፳ ባርክዎ ለእግዚአብሔር ኵልክሙ መላእክቲሁ፤ ጽኑዓን ወኀያላን እለ ትገብሩ ቃሎ ወእለ ትሰምዑ ቃለ ነገሩ።
፳፩ ባርክዎ ለእግዚአብሔር ኵሉ ኀይሉ፤ ላእካኑ እለ ይገብሩ ፈቃዶ።
፳፪ ባርክዎ ለእግዚአብሔር ኵሉ ተግባሩ፤ ውስተ ኵሉ በሐውርተ መለኮቱ፤ ትባርኮ ነፍስየ ለእግዚአብሔር።