መዝሙር 118
መዝሙራት ዘዳዊት ምዕራፍ ፻፲፰ ሀሌሉያ።
፩ ግነዩ ለእግዚአብሔር እስመ ኄር፤ እስመ ለዓለም ምሕረቱ።
፪ ንግሩ ቤተ እስራኤል ከመ ኄር፤ ከመ ለዓለም ምሕረቱ።
፫ ንግሩ ቤተ አሮን ከመ ኄር፤ ከመ ለዓለም ምሕረቱ።
፬ ንግሩ ኵልክሙ እለ ትፈርህዎ ለእግዚአብሔር ከመ ኄር፤ ከመ ለዓለም ምሕረቱ።
፭ ሶበ ተመንደብኩ ጸዋዕክዎ ለእግዚአብሔር፤ ወሰምዐኒ ወአርሐበ ሊተ።
፮ እግዚአብሔር ይረድአኒ ኢይፈርህ፤ እጓለ እመሕያው ምንተ ይሬስየኒ።
፯ እግዚአብሔር ይረድአኒ፤ ወአነ እሬእዮሙ ለጸላእትየ።
፰ ይኄይስ ተአምኖ በእግዚአብሔር፤ እምተአምኖ በእጓለ እመሕያው።
፱ ይኄይስ ተአምኖ በእግዚአብሔር፤ እምተሰፍዎ በመላእክት።
፲ ኵሎሙ አሕዛብ ዐገቱኒ፤ ወበስመ እግዚአብሔር ሞአክዎሙ።
፲፩ ዐጊተሰ ዐገቱኒ፤ ወበስመ እግዚአብሔር ሞአክዎሙ።
፲፪ ዐገቱኒ ከመ ንህብ መዓረ ወነዱ ከመ እሳት ውስተ አስዋክ፤ ወበስመ እግዚአብሔር ሞአክዎሙ።
፲፫ ተንተንኩ ለወዲቅ፤ ወእግዚአብሔር አንሥአኒ።
፲፬ ኀይልየኒ ወዝክርየኒ እግዚአብሔር፤ ወውእቱ ኮነኒ መድኀንየ።
፲፭ ቃለ ትፍሥሕት ውስተ አብያቲሆሙ ለጻድቃን፤
፲፮ የማነ እግዚአብሔር ገብረት ኀይለ። የማነ እግዚአብሔር አልዐለተኒ፤ የማነ እግዚአብሔር ገብረት ኀይለ።
፲፯ ኢይመውት ዘእንበለ ዘአሐዩ፤ ወእነግር ግብሮ ለእግዚአብሔር።
፲፰ ገሥጾሰ ገሠጸኒ እግዚአብሔር፤ ወለሞትሰ ባሕቱ ኢመጠወኒ።
፲፱ አርኅዉ ሊተ አናቅጸ ጽድቅ፤ እባእ ውስቴቶን ወእግነየ ለእግዚአብሔር። ዝአንቀጽ እንተ እግዚአብሔር፤ ጻድቃን ይበውኡ ውስቴታ።
፳ እገኒ ለከ እግዚኦ እስመ ሰማዕከኒ፤ ወኮንከኒ መድኀንየ።
፳፩ እብን ዘመነንዋ ነደቅት፤ ይእቲ ኮነት ውስተ ርእሰ ማዕዘንት።
፳፪ እምኀበ እግዚአብሔር ኮነት ዛቲ፤ ወነካር ይእቲ ለአዕይንቲነ።
፳፫ ዛቲ ዕለት እንተ ገብረ እግዚአብሔር፤ ንትፈሣሕ ወንትሐሠይ ባቲ።
፳፬ ኦእግዚኦ አድኅንሶ፤ ኦእግዚኦ ሠርሐሶ። ቡሩክ ዘይመጽእ በስመ እግዚአብሔር፤
፳፭ በረክናክሙ እምቤተ እግዚአብሔር። እግዚአብሔር እግዚእ ወአስተርአየ ለነ፤
፳፮ ግበሩ በዓለ በትፍሥሕት በኀበ እለ ያስተሓምምዎ እስከ አቅርንቲሁ ለምሥዋዕ።
፳፯ አምላኪየ አንተ ወእገኒ ለከ፤ አምላኪየ አንተ ወኣሌዕለከ።
፳፰ እገኒ ለከ እግዚኦ እስመ ሰማዕከኒ ወኮንከኒ መድኀንየ።
፳፱ ግነዩ ለእግዚአብሔር እስመ ኄር፤ እስመ ለዓለም ምሕረቱ።