መዝሙር 119
መዝሙራት ዘዳዊት ምዕራፍ ፻፲፱ ሀሌሉያ።
፩ ፩፤ አሌፍ። ብፁአን እለ ንጹሓን በፍኖቶሙ፤ እለ ይሐውሩ በሕገ እግዚአብሔር።
፪ ብፁዓን እለ ይኀሡ ስምዖ፤ ወበኵሉ ልቦሙ ይኀሥዎ።
፫ ወእለሰ ይገብሩ ዐመፃ፤ ፍኖተ ዚአሁ ኢሖሩ።
፬ አንተ አዘዝከ ይዕቀቡ ትእዛዘከ ፈድፋደ።
፭ ይረትዕሰ ይርታዕ ፍኖትየ፤ ከመ እዕቀብ ኵነኔከ።
፮ ውእቱ ጊዜ ኢይትኀፈር፤ በርእየ ኵሉ ትእዛዝከ።
፯ እገኒ ለከ እግዚኦ በልብ ርቱዕ፤ ሶበ ተመሀርኩ ኵነኔ ጽድቅከ።
፰ ወአዐቅብ ኵነኔከ፤ ወኢትግድፈኒ ለዝሉፉ።
፱ ፪፤ ቤት። በምንተ ያረትዕ ወሬዛ ፍኖቶ፤ በዐቂበ ነቢብከ።
፲ በኵሉ ልብየ ኀሠሥኩከ፤ ኢታርሕቀኒ እምትእዛዝከ።
፲፩ ውስተ ክብየ ኀባእኩ ነቢበከ፤ ከመ ኢየአብስ ለከ።
፲፪ ብሩክ አንተ እግዚኦ ወምህረኒ ኵነኔከ።
፲፫ በከናፍርየ ነገርኩ ኵሎ ኰነኔ አፉከ።
፲፬ በፍኖተ ስመዕከ ተፈሣሕኩ፤ ከመ ዘበኵሉ ብዕል።
፲፭ ወእዛዋዕ በትእዛዝከ፤ ወአኀሥሥ ፍናዊከ።
፲፮ ወኣነብብ ትእዛዛቲከ፤ ወኢይረስዕ ቃለከ።
፲፯ ፫፤ ጋሜል። ዕስዮ ለገብርከ ከመ እሕዮ፤ ወእዕቀብ ነቢበከ።
፲፰ ክሥቶን ለአዕይንትየ ወእርአይ፤ መድምመከ እምሕግከ።
፲፱ ፈላሲ አነ ውስተ ምድር፤ ኢትኅባእ እምኔየ ትእዛዘከ።
፳ አፍቀረት ነፍስየ ወፈተወት ኵነኔከ በኵሉ ጊዜ።
፳፩ ገሠጽኮሙ ለዕቡያን፤ ርጉማን እለ ይትገሐሡ እምትእዛዝከ።
፳፪ ኣእትት እምኔየ ጽእለተ ወኀሳረ፤ እስመ ትእዛዘከ ኀሠሥኩ።
፳፫ እስመ ነበሩ መላእክት ወኪያየ ሐመዩ፤ ወገብርከሰ ይዛዋዕ በኵነኔከ።
፳፬ እስመ ስምዕከ ተመሀርየ ውእቱ፤ ወምክርየኒ ኵነኔ ዚአከ።
፳፭ ፬፤ ዳሌጥ። ጠግዐት ነፍስየ በምድር፤ ኣሕይወኒ በከመ ነቢብከ።
፳፮ ነገርኩ ፍናዊከ ወሰማዕከኒ፤ ወምህረኒ ኵነኔከ።
፳፯ ፍኖተ ጽድቅከ አለብወኒ፤ ወእዛዋዕ በመንክርከ።
፳፰ ደቀሰት ነፍስየ እምሐዘን፤ አጽንዐኒ በነቢብከ።
፳፱ ፍኖተ ዐመፃ አርሕቅ እምኔየ፤ ወበሕግከ ተሣሀለኒ።
፴ ፍኖተ ጽድቅከ አብደርኩ፤ ወኵነኔከሰ ኢረሳዕኩ።
፴፩ ተለውኩ ስምዐከ፤ እግዚኦ ኢታስተኀፍረኒ።
፴፪ ፍኖተ ትእዛዝከ ሮጽኩ፤ ሶበ አርሐብኮ ለልብየ።
፴፫ ፭፤ ሄ። ምህረኒ እግዚኦ ፍኖተ ጽድቅከ፤ ወእኅሥሣ በኵሉ ጊዜ።
፴፬ አለብወኒ ወእኅሥሥ ሕገከ፤ ወእዕቀቦ በኵሉ ልብየ።
፴፭ ምርሐኒ ፍኖተ ትእዛዝከ፤ እስመ ኪያሃ ፈቀድኩ።
፴፮ ሚጥ ልብየ ውስተ ስምዕከ፤ ወአኮ ውስተ ትዕግልት።
፴፯ ሚጦን ለአዕይንትየ ከመ ኢይርአያ ከንቶ፤ ወኣሕይወኒ በፍኖትከ።
፴፰ አቅም ለገብርከ ዘነበብከ ውስተ ነቢብከ።
፴፱ ኣእትት እምኔየ ጽእለተ ዘተሐዘብኩ፤ እስመ ሠናይ ኵነኔከ።
፵ ናሁ ፈተውኩ ትእዛዘከ፤ ወኣሕይወኒ በጽድቅከ።
፵፩ ፮፤ ዋው። ወይምጻእ ላዕሌየ ምሕረትከ እግዚኦ፤ እግዚኦ አድኅኖትከ በከመ ነቢብከ።
፵፪ አውሥኦሙ ቃለ ለእለ ይጼእሉኒ፤ እስመ ተወከልኩ በቃልከ።
፵፫ ወኢታእትት ቃለ ጽድቅ እምአፉየ ለግሙራ፤ እስመ ተወከልኩ በኵነኔከ።
፵፬ ወአዐቅብ ሕገከ በኵሉ ጊዜ፤ ለዓለም ወለዓለመ ዓለም።
፵፭ ወአሐውር ስፉሕ፤ እስመ ትእዛዘከ ኀሠሥኩ።
፵፮ ወእነግር ስምዐከ በቅድመ ነገሥተ፤ ወኢይትኀፈር።
፵፯ ወኣነብብ ትእዛዘከ፤ ዘአፍቀርኩ ጥቀ።
፵፰ ወኣነሥእ እደውየ ኀበ ትእዛዝከ ዘአፍቀርኩ፤ ወእዛዋዕ በትእዛዝከ።
፵፱ ፯፤ ዛይ። ተዘከር ቃለከ ዘአሰፈውኮ ለገብርከ።
፶ ወይእቲ አስተፈሥሐተኒ በሕማምየ፤ እስመ ቃልከ ኣሕየወኒ።
፶፩ ዕቡያን ዐመፃ ፈድፋደ፤ ወእምሕግከሰ ኢተገሐሥኩ።
፶፪ ወተዘከርኩ ፍትሐከ ዘእምዓለም፤ ወተፈሣሕኩ እግዚኦ።
፶፫ ሐዘን አኀዘኒ እምኃጥኣን፤ እለ ኀደጉ ሕገከ።
፶፬ መዝሙር ኮነኒ ኵነኔከ፤ በብሔር ኀበ ፈለስኩ።
፶፭ ተዘከርኩ በሌሊት ስመከ እግዚኦ፤ ወዐቀብኩ ሕገከ።
፶፮ ወይእቲ ኮነተኒ፤ እስመ ኵነኔከ ኀሠሥኩ።
፶፯ ፰፤ ሔት። ክፍልየ እግዚአብሔር፤ ወእቤ ይዕቀቡ ሕገከ።
፶፰ ሰአልኩ ገጸከ እግዚኦ በኵሉ ልብየ፤ ተሣሀለኒ በከመ ነቢብከ።
፶፱ ወሐለይኩ በእንተ ፍናዊከ፤ ወሜጥኩ እግርየ ውስተ ስምዕከ።
፷ አጥባዕኩ ወኢናፈቁ፤ ለዐቂበ ትእዛዝከ።
፷፩ አሕባለ ኃጥኣን ተፀፍራ ላዕሌየ፤ ወሕገከሰ ኢረሳዕኩ።
፷፪ መንፍቀ ሌሊት እትነሣእ ከመ እግነይ ለከ፤ በእንተ ኵነኔ ጽድቅከ።
፷፫ ከማሆሙ አነ ለኵሎሙ እለ ይፈርሁከ፤ ወለእለ የዐቅቡ ትእዛዘከ።
፷፬ ሣህልከ እግዚኦ መልአ ምድረ፤ ወምህረኒ ኵነኔከ።
፷፭ ፱፤ ጤት። ሠናይተ ገበርከ ላዕለ ገብርከ፤ እግዚኦ በከመ ቃልከ።
፷፮ ሠናይተ ምክር ወጥበበ ምህረኒ፤ እስመ ተአመንኩ በትእዛዝከ።
፷፯ ወአንሰ ዘእንበለ እሕምም ነሳሕኩ፤ ወበእንተዝ አነ ዐቀብኩ ነቢበከ።
፷፰ ኄር አንተ እግዚኦ፤ ወበኂሩትከ ምህረኒ ኵነኔከ።
፷፱ በዝኀ ላዕሌየ ዐመፃሆሙ ለዕቡያን፤ ወአንሰ በኵሉ ልብየ ኀሠሥኩ ትእዛዘከ።
፸ ረግዐ ከመ ሐሊብ ልቦሙ፤ ወአንሰ ኣነብብ በሕግከ።
፸፩ ደለወኒ ዘኣሕመምከኒ፤ ከመ አእምር ኵነኔከ።
፸፪ ይኄይሰኒ ሕገ አፉከ፤ እምኣእላፍ ወርቅ ወብሩር።
፸፫ ፲፤ ዮድ። እደቂከ ገብራኒ ወለሐኳኒ፤ ኣለብወኒ ወእትመሀር ትእዛዘከ።
፸፬ እለ ይፈርሁከ ይርእዩኒ ወይትፌሥሑ፤ እስመ ተወከልኩ በነቢብከ።
፸፭ ኣእመርኩ እግዚኦ ከመ ጽድቅ ኵነኔከ፤ ወበርቱዕ ኣሕመምከኒ።
፸፮ ይኩነኒ ምሕረትከ ከመ ያስተፈሥሐኒ፤ ወበከመ ነቢብከ ይኩኖ ለገብርከ።
፸፯ ይምጽአኒ ሣህልከ ወእሕየው፤ እስመ ተመሀርየ ውእቱ ሕግከ።
፸፰ ይትኀፈሩ ዕቡያን እስመ ዐመፃ መከሩ ላዕሌየ፤ ወአንሰ እዛዋዕ በትእዛዝከ።
፸፱ ይግብኡኒ እለ ይፈርሁከ፤ ወእለ ያአምሩ ስምዐከ።
፹ ለይኩን ልብየ ንጹሐ በኵነኔከ፤ ከመ ኢይተኀፈር።
፹፩ ፲፩፤ ካፍ። ኀለፈት ነፍስየ ውስተ አድኅኖትከ፤ ወተወከልኩ በቃልከ።
፹፪ ደክማ አዕይንትየ ለመድኀኒትከ፤ እንዘ ይብላ ማእዜ ታስተፌሥሐኒ።
፹፫ እስመ ኮንኩ ከመ ዝቅ ውስተ አስሐትያ፤ ወኵነኔከሰ ኢረሳዕኩ።
፹፬ ሚመጠን እማንቱ መዋዕሊሁ ለገብርከ፤ ወማእዜ ትፈትሕ ሊተ እምእለ ይሰዱኒ።
፹፭ ነገሩኒ ኃጥኣን ዘውዐ፤ ወአኮሰ ከመ ሕግከ እግዚኦ።
፹፮ ኵሉ ትእዛዝከ ጽድቅ፤ በዐመፃ ሰደዱኒ ርድአኒ።
፹፯ ሕቀ ከመ ዘእምደምሰሱኒ ውስተ ምድር፤ ወአንሰ ኢኀደጉ ትእዛዘከ።
፹፰ በከመ ምሕረትከ ኣሕይወኒ፤ ወእዕቀብ ስምዐ አፉከ።
፹፱ ፲፪፤ ላሜድ። እግዚኦ ለዓለም ይነብር ቃልከ ውስተ ሰማይ።
፺ ወለትውልደ ትውልድ ጽድቅከ፤ ሳረርካ ለምድር ወትነብር።
፺፩ ወበትእዛዝከ ይቀውም ዕለት፤ እስመ ኵሎ ቀነይከ።
፺፪ ሶበ አኮ ሕግከ ተመሀርየ ውእቱ፤ ትካት እምተሐጐልኩ በኀሳርየ።
፺፫ ለዓለም ኢይረስዕ ኵነኔከ፤ እስመ ቦቱ አሕየውከኒ።
፺፬ ዘዚአከ አነ አድኅነኒ፤ እስመ ኵነኔከ ኀሠሥኩ።
፺፭ ኪያየ ይጸንሑ ኃጥኣን ይቅትሉኒ፤ እስመ ስምዐከ ለበውኩ።
፺፮ ለኵሉ ግብር ርኢኩ ማኅለቅቶ፤ ወትእዛዝከሰ ርሒብ ፈድፋደ።
፺፯ ፲፫፤ ሜም። ጥቀ አፍቀርኩ ሕገከ እግዚኦ፤ ኵሎ አሚረ ተምሀርየ ውእቱ።
፺፰ እምጸላእትየ አጥበበኒ ትእዛዝከ፤ እስመ ለዓለም ሊተ ውእቱ።
፺፱ እምኵሎሙ እለ መሀሩኒ ጠበብኩ፤ እስመ ተመሀርየ ውእቱ ትእዛዝከ።
፻ ወእምአእሩግኒ ጠበብኩ፤ እስመ ትእዛዘከ ኀሠሥኩ።
፻፩ እምኵሉ ፍኖተ ዐመፃ ከላእኩ እግርየ፤ ከመ እዕቀብ ነቢበከ።
፻፪ ወኢተገሐስኩ እምኵነኔከ፤ እስመ አንተ መሀርከኒ።
፻፫ ጥዑም ለጕርዔየ ነቢብከ፤ እምዓር ወሶከር ጥዕመኒ ለአፉየ።
፻፬ እምትእዛዝከ ለበውኩ፤ በእንተዝ ኵሎ ፍኖተ ዐመፃ ጸላእኩ።
፻፭ ፲፬፤ ኖን። ማሕቶት ለእግርየ ሕግከ፤ ብርሃን ለፍኖትየ።
፻፮ መሐልኩ ወአጥባዕኩ፤ ከመ እዕቀብ ኵነኔ ጽድቅከ።
፻፯ ሐመምኩ ፈድፋደ፤ እግዚኦ ኣሕይወኒ በከመ ነቢብከ።
፻፰ ሥመር እግዚኦ ቃለ አፉየ፤ ወምህረኒ ኵነኔከ።
፻፱ ነፍስየ ውስተ እዴከ በኵሉ ጊዜ፤ ወኢረሳዕኩ ሕገከ።
፻፲ ሠርዑ ሊተ ኃጥኣን መሥገርተ፤ ወኢስሕትኩ እምትእዛዝከ።
፻፲፩ ወረስኩ ስምዐከ ለዓለም፤ እስመ ሐሤቱ ለልብየ ውእቱ።
፻፲፪ ሜጥኩ ልብየ ከመ እግበር ትእዛዘከ፤ ለዓለም ዘእንበለ ሒስ።
፻፲፫ ፲፭፤ ሳምኬት። ዐማፂያነ ጻላእኩ፤ ወሕገከሰ አፍቀርኩ።
፻፲፬ ረዳኢየ ወምስካይየ አንተ፤ ወበቃልከ ተወከልኩ።
፻፲፭ ተገሐሡ እምኔየ ዐማፂያን፤ ወእኅሥሥ ትእዛዞ ለአምላኪየ።
፻፲፮ ተወከፈኒ በከመ ነቢብከ ወእሕየው፤ ወኢታስተኀፍረኒ እምተስፋየ።
፻፲፯ ርድእኒ ወአድኅነኒ፤ ወኣነብብ በኵነኔከ በኵሉ ጊዜ።
፻፲፰ ኣኅሰርኮሙ ለኵሎሙ እለ ይርሕቁ እምትእዛዝከ፤ እስመ ዐመፃ ፍትወቶሙ።
፻፲፱ ዐላውያን እሙንቱ ኵሎሙ ኃጥኣነ ምድር፤ በእንተዝ አፍቀርኩ ስምዐከ።
፻፳ አውድድ ውስተ ሥጋየ ፈሪሆተከ፤ እስመ ፈራህኩ እምኵነኔከ።
፻፳፩ ፲፮፤ ዔ ገበርኩ ፍትሐ ወጽድቀ፤ ኢትመጥወኒ ለእለ ይሣቅዩኒ።
፻፳፪ ጽንሖ ለገብርከ ውስተ ሠናይ፤ ወኢይትዐገሉኒ ዕቡያን።
፻፳፫ ደክማ አዕይንትየ ለአድኅኖትከ፤ ወለቃለ ጽድቅከ።
፻፳፬ ግበር ለገብርከ በከመ ምሕረትከ፤ ወምህረኒ ኵነኔከ።
፻፳፭ ገብርከ አነ ኣለብወኒ፤ ወኣእምር ስምዐከ።
፻፳፮ ጊዜ ለገቢር ለእግዚአብሔር፤ ወዐለዉ ሕገከ።
፻፳፯ በእንተዝ አፍቀርኩ ትእዛዘከ፤ እምወርቅ ወእምጳዝዮን።
፻፳፰ በእንተዝ አርታዕኩ ኀበ ኵሉ ትእዛዝከ፤ ኵሎ ፈኖተ ዐመፃ ጸላእኩ።
፻፳፱ ፲፯፤ ፌ። መንክር ስምዕከ፤ በእንተዝ ኀሠሠቶ ነፍስየ።
፻፴ ነገረ ቃልከ ያበርህ፤ ወያጠብብ ሕፃናተ።
፻፴፩ አፉየ ከሠትከ ወነፍስየ አናኅኩ፤ እስመ ትእዛዘከ አፍቀርኩ፤
፻፴፪ ነጽር ላዕሌየ ወተሣሀለኒ፤ በከመ ፍትሖሙ ለእለ ያፍቅሩ ስመከ።
፻፴፫ አርትዕ ፍኖትየ ወሑረትየ በከመ ነቢብከ፤ ወአይምአኒ ኵሉ ኀጢአት።
፻፴፬ አድኅነኒ እምትእግልተ እጓለ እመሕያው፤ ወእዕቀብ ትእዛዘከ።
፻፴፭ አብርህ ገጸከ ላዕለ ገብርከ፤ ወምህረኒ ኵነኔከ።
፻፴፮ ሙሓዘ ማይ ወረደ እምአዕይንትየ፤ ወእመአኮሰ እምኢዐቅብኩ ሕገከ።
፻፴፯ ፲፰፤ ጻዴ። ጻድቅ አንተ እግዚኦ፤ ወርቱዕ ኳነኔከ።
፻፴፰ ወአዘዝከ ስምዐከ በጽድቅ፤ ወርቱዓ ፈድፋደ።
፻፴፱ መሰወኒ ቅንአተ ቤትከ፤ እስመ ረስዑ ትእዛዘከ ጸላእትየ።
፻፵ ርሱን ቃልከ ፈድፋደ፤ ወገብርከሰ አፍቀሮ።
፻፵፩ ወሬዛ አነ ወትሑት፤ ወሕገከሰ ኢረሳዕኩ።
፻፵፪ ጽድቅከሰ ጽድቅ ዘለዓለም፤ ወቃልከኒ እሙን ውእቱ።
፻፵፫ ሕማም ወምንዳቤ ረከበኒ፤ ወትእዛዝከሰ ተመሀርየ ውእቱ።
፻፵፬ ጽድቅ ውእቱ ስምዕከ ለዓለም፤ ኣለብወኒ ወኣሕይወኒ።
፻፵፭ ፲፱፤ ቆፍ። ጸራኅኩ በኵሉ ልብየ ስምዐኒ እግዚኦ፤ ወኀሠሥኩ ኵነኔከ።
፻፵፮ ጸራኅኩ ኀቤከ ስምዐኒ ወአድኅነኒ፤ ወእዕቀብ ስምዐከ።
፻፵፯ በጻሕኩ ማእከለ አድባር ወከላሕኩ፤ እስመ ቃለከ ተሰፈውኩ።
፻፵፰ በጽሓ አዕይንትየ ለገዪስ፤ ከመ ኣንብብ ቃለከ።
፻፵፱ ሰማዕ እግዚኦ ቃልየ በከመ ሣህልከ፤ ወኣሕይወኒ በከመ ፍትሕከ።
፻፶ ቀርቡ እለ ሮዱኒ በዐመፃ፤
ወእምሕግከሰ ርሕቁ።
፻፶፩ ቅሩብ አንተ እግዚኦ፤ ወርቱዕ ኵሉ ፍናዊከ።
፻፶፪ እምትካት አእመርኩ እምስምዕከ፤ ከመ ለዓለም ሳረርኮን።
፻፶፫ ፳፤ ሬስ። ርኢ ሕማምየ ወአድኅነኒ፤ እስመ ኢረሳዕኩ ሕገከ።
፻፶፬ ፍታሕ ፍትሕየ ወባልሐኒ፤ ወበእንተ ቃልከ ኣሕይወኒ።
፻፶፭ ርሑቅ ሕይወት እምኃጥኣን፤ እስመ ኢኀሠሡ ኵነኔከ።
፻፶፮ ብዙኅ ሣህልከ እግዚኦ ፈድፋደ፤ ወኣሕይወኒ በከመ ፍትሕከ።
፻፶፯ ብዙኃን እለ ሮዱኒ ወአመንደቡኒ፤ ወኢተገሐስኩ እምስምዕከ።
፻፶፰ ርኢኩ አብደነ ወተከዝኩ፤ እስመ ኢዐቀቡ ቃለከ።
፻፶፱ ርኢ ከመ አፍቀርኩ ትእዛዘከ፤ እግዚኦ ኣሕይወኒ በሣህልከ።
፻፷ ቀዳሜ ቃልከ ጽድቅ ውእቱ፤ ወለዓለም ኵሉ ኵነኔከ ጽድቅ።
፻፷፩ ፳፩፤ ሳን። መላእክት ሰደዱኒ በከንቱ፤ ወእምቃልከ ደንገፀኒ ልብየ።
፻፷፪ ወበቃልከ ተፈሣሕኩ፤ ከመ ዘረከበ ምህርካ ብዙኀ።
፻፷፫ ዐመፃ ጸላእኩ ወአስቆረርኩ፤ ወሕገከሰ አፍቀርኩ።
፻፷፬ ስብዐ ለዕለትየ እሴብሐከ፤ በእንተ ኵነኔ ጽድቅከ።
፻፷፭ ሰላም ብዙኅ ለእለ ያፍቅሩ ስመከ፤ ወአልቦሙ ዕቅፍተ።
፻፷፮ ተሰፈውኩ አድኅኖተከ እግዚኦ፤ ወዐቀብኩ ትእዛዘከ።
፻፷፯ ዐቀበት ነፍስየ ስምዐከ፤ ወአፍቀረቶ ፈድፋደ።
፻፷፰ ዐቀብኩ ትእዛዘከ ወስምዐከኒ፤ እስመ ኵሉ ፍናዊየ ቅድሜከ እግዚኦ።
፻፷፱ ፳፪፤ ታው። ለትቅረብ ስእለትየ ኀቤከ እግዚኦ፤ ወበከመ ቃልከ አለብወኒ።
፻፸ ትብጻሕ አስተብቍዖትየ ቅድሜከ እግዚኦ፤ ወበከመ ቃልከ አድኅነኒ።
፻፸፩ ጐሥዐ ከናፍርየ ስብሐቲከ፤ እስመ መሀርከኒ ኵነኔከ።
፻፸፪ ነበበ ልሳንየ ቃለከ፤ እስመ ጽድቅ ኵሉ ትእዛዝከ።
፻፸፫ ይኩነኒ የማንከ ከመ ያድኅነኒ፤ እስመ ትእዛዘከ አፍቀርኩ።
፻፸፬ አፍቀርኩ አድኅኖተከ እግዚኦ፤ ወሕግከሰ ተመሀርየ ውእቱ።
፻፸፭ ትሕየወኒ ነፍስየ ወእሰብሐከ፤ ወይርድአኒ ኵነኔ ዚአከ።
፻፸፮ ተረሳዕኩ ከመ በግዕ ዘተገድፈ ኅሥሦ ለገብርከ እስመ ትእዛዘከ ኢረሳዕኩ።