መዝሙር 146
መዝሙራት ዘዳዊት ምዕራፍ ፻፵፮ ሀሌሉያ ዘሐጌ ወዘካርያስ።
፩ ታአኵቶ ነፍስየ ለእግዚአብሔር። እሴብሖ ለእግዚአብሔር በሕይወትየ፤ ወእዜምር ለአምላኪየ በአምጣነ ሀለውኩ።
፪ ኢትትአመኑ በመላእክት፤ ወኢበእጓለ እመሕያው እለ ኢይክሉ አድኅኖ።
፫ ትወፅእ ነፍሶሙ ወይገብኡ ውስተ መሬቶሙ፤ ውእተ አሚረ ይጠፍእ ኵሉ ምክሮሙ።
፬ ብፁዕ ብእሲ ዘአምላከ ያዕቆብ ረዳኢሁ፤ ወትውክልቱኒ ላዕለ እግዚአብሔር አምላኩ። ዘገብረ ሰማየ ወምድረ ባሕረ ወኵሎ ዘውስቴታ፤
፭ ዘየዐቅባ ለጽድቅ ለዓለም። ወይፈትሕ ሎሙ ለግፉዓን ዘይሁቦሙ ሲሳዮሙ ለርኁባን፤
፮ እግዚአብሔር ይፈትሖሙ ለሙቁሓን። እግዚአብሔር ያነሥኦሙ ለእለ ወድቁ፤
፯ እግዚአብሔር ያጠብቦሙ ለዕዉራን፤ እግዚአብሔር ያፍቅሮሙ ለጻድቃን።
፰ እግዚአብሔር የዐቅቦሙ ለፈላስያን ወይትወከፎሙ ለአቤራት ወለእጓለ ማውታ፤ ወያመስን ፍኖተ ኃጥኣን።
፱ ይነግሥ እግዚአብሔር ለዓለም፤ አምላክኪ ጽዮን ለትውልደ ትውልድ።