መዝሙረ ዳዊት19
መዝሙረ ዳዊት ምዕራፍ ፲፱ ፍጽሜ መዝሙር ዘዳዊት።
፩ ሰማያት ይነግራ ስብሐተ እግዚአብሔር፤ ወግብረ እደዊሁ ያየድዓ ሰማያት።
፪ ዕለት ለዕለት ትጐሥዕ ነቢበ፤ ወሌሊት ለሌሊት ታየድዕ ጥበበ።
፫ አልቦ ነገረ ወአልቦ ነቢበ ዘኢተሰምዐ ቃሎሙ።
፬ ውስተ ኵሉ ምድር ወፅአ ነገሮሙ ወእስከ አጽናፈ ዓለም በጽሐ ነቢቦሙ፤
፭ ወውስተ ፀሓይ ሤመ ጽላሎቶ። ወውእቱሰ ከመ መርዓዊ ዘይወፅእ እምጽርሑ፤
፮ ይትፌሣሕ ከመ ይርባሕ ዘይሜርድ ፍኖቶ። እምአጽናፈ ሰማይ ሙፅኡ
፯ ወእስከ አጽናፈ ሰማይ ምእታዉ፤ ወአልቦ ዘይትኀባእ እምላህቡ።
፰ ሕጉ ለእግዚአብሔር ንጹሕ ወይመይጣ ለነፍስ፤ ስምዑ ለእግዚአብሔር እሙን ዘያጠብብ ሕፃናተ።
፱ ኵነኔሁ ለእግዚአብሔር ርቱዕ ወይስተፌሥሕ ልበ፤ ትእዛዙ ለእግዚአብሔር ብሩህ ወይበርህ አዕይንተ።
፲ ፈሪሀ እግዚአብሔር ንጹሕ ወየሐዩ ለዓለም፤ ፍትሑ ለእግዚአብሔር ጽድቅ፤ ወርትዕ ኅቡረ።
፲፩ ወይትፈተው እምወርቅ ወእምዕንቍ ክቡር፤ ወይጥዕም እመዓር ወሶከር።
፲፪ ወገብርከሰ የዐቅቦ፤ ወበዐቂቦቱ ይትዐሰይ ብዙኀ።
፲፫ ለስሒት መኑ ይሌብዋ፤ እምኅቡኣትየ አንጽሐኒ። ወእምነኪር መሐኮ ለገብርከ።
፲፬ እመሰ ኢቀነዩኒ ውእተ ጊዜ ንጹሐ እከውን፤ ወእነጽሕ እምዐባይ ኀጢአትየ።
፲፭ ወይከውን ሥሙረ ቃለ አፉየ ወሕሊና ልብየኒ ቅድሜየ ውእቱ በኵሉ ጊዜ።
፲፮ እግዚእየ ረዳኢየ ወመድኀንየ።