መዝሙረ ዳዊት46
መዝሙረ ዳዊት ምዕራፍ ፵፮ ፍጻሜ ዘደቂቀ ቆሬ በእንተ ኅቡኣት መዝሙር ዘዳዊት።
፩ አምላክነሰ ኀይልነ ወጸወንነ፤ ወረዳኢነ ውእቱ በምንዳቤነ ዘረከበነ ፈድፋደ።
፪ በእንተዝ ኢንፈርህ ለእመ አድለቅለቀት ምድር፤ ወእመኒ ፈለሱ አድባር ውስተ ልብ ባሕር።
፫ ደምፁ ወተሐመጉ ማያቲሆሙ፤ ወአድለቅለቁ አድባር እምኀይሉ።
፬ ፈለግ ዘይውሕዝ ያስተፌሥሕ ሀገረ እግዚአብሔር፤ ቀደሰ ማኅድሮ ልዑል።
፭ እግዚአብሔር ውስተ ማእከላ ኢትትሀወክ፤ ወይረድኣ እግዚአብሔር ፍጹመ።
፮ ደንገፁ አሕዛብ ወተመይጡ ነገሥት፤ ወሀበ ቃሎ ልዑል ወአድለቅለቀት ምድር።
፯ እግዚኦ ኀያላን ምስሌነ፤ ወምስካይነ አምላኩ ለያዕቆብ።
፰ ንዑ ወትርአዩ ገብሮ ለእግዚአብሔር፤ ዘገብረ መንክረ በዲበ ምድር። ይስዕር ፀብአ እስከ አጽናፈ ምድር፤
፱ ይሰብር ቀስተ ወይቀጠቅጥ ወልታ ወያውዒ በእሳት ንዋየ ሐቅል።
፲ አስተርክቡ ወአእምሩ ከመ አነ ውእቱ እግዚአብሔር፤ ተለዐልኩ እምአሕዛብ ወተለዐልኩ እምድር።
፲፩ እግዚአ ኀያላን ምስሌነ፤ ወምስካይነ አምላኩ ለያዕቆብ።