መዝሙረ ዳዊት78
መዝሙረ ዳዊት ምዕራፍ ፸፰ ዘበኣእምሮ ዘአሳፍ።
፩ አፅምኡ ሕዝብየ ሕግየ፤ ወጽልዉ እዝነክሙ ኀበ ቃለ አፉየ።
፪ እከሥት በምሳሌ አፉየ፤ ወእነግር አምሳለ ዘእምትካት።
፫ ኵሎ ዘሰማዕነ ወዘርኢነ፤ ወዘነገሩነ አበዊነ።
፬ ወኢኀብኡ እምደቂቆሙ ለካልእ ትውልድ
፭ ወነገሩ ስብሐቲሁ ለእግዚአብሔር፤ ኀይሎሂ ወመንክሮሂ ዘገብረ።
፮ ዘአቀመ ስምዐ ለያዕቆብ ወሠርዐ ሕገ ለእስራኤል፤
፯ ዘአዘዞሙ ለአበዊነ ከመ ይንግሩ ለደቂቆሙ። ከመ ያእምር ካልእ ትውልድ፤
፰ ደቂቅ እለ ይትወለዱ ወይትነሥኡ ወይዜንዉ ለደቂቆሙ።
፱ ከመ ይረስዩ ትውክልቶሙ ላዕለ እግዚአብሔር፤ ወከመ ኢይርስዑ ግብረ እግዚአብሔር ወይኅሥሡ ትእዛዞ።
፲ ከመ ኢይኩኑ ከመ አበዊሆሙ፤ ትውልድ ዕሉት ወመራር።
፲፩ ትውልድ እንተ ኢያርትዐት ልባ፤ ወኢተአምነት መንፈሳ በእግዚአብሔር።
፲፪ ደቂቀ ኤፍሬም ይወስቁ ወይነድፉ፤ ወተገፍትኡ አመ ዕለተ ቀትል።
፲፫ እስመ ኢዐቀቡ ኪዳኖ ለእግዚአብሔር፤ ወአበዩ ሐዊረ በሕጉ።
፲፬ ወረስዑ ረድኤቶ። ወመንክሮሂ ዘአርአዮሙ።
፲፭ ዘገብረ መንክረ በቅድመ አባዊሆሙ፤ በምድረ ግብጽ ወበሐቀለ ጣኔዎስ።
፲፮ ሰጠቀ ባሕረ ወአኅለፎሙ፤ ወአቀመ ማየ ከመ ዝቅ።
፲፯ ወመርሖሙ መዐልተ በደመና፤ ወኵሎ ሌሊተ በብርሃነ እሳት።
፲፰ ወአንቅዐ ኰኵሐ በበድው፤ ወአስተዮሙ ከመ ዘእምቀላይ ብዙኅ።
፲፱ ወአውፅአ ማየ እምእብን፤ ወአውሐዘ ማየ ከመ ዘአፍላግ።
፳ ወደገሙ ዓዲ ወአበሱ ሎቱ፤ ወአምረርዎ ለልዑል በበድው።
፳፩ ወአመከርዎ ለእግዚአብሔር በልቦሙ፤ ከመ ይስአሉ መብልዐ ለነፍሶሙ።
፳፪ ሐመይዎ ለእግዚአብሔር ወይቤሉ፤ ይክልኑ እግዚአብሔር ሠሪዐ ማእድ በገዳም።
፳፫ ይዝብጥ ኰኵሐ ወያውሕዝ ማየ፤
፳፬ ወይክልኑ ውሂበ ኅብስት ወይሥራዕ ማዕደ ለሕዝቡ።
፳፭ ወሰምዐ ዘንተ እግዚአብሔር ወአናሕሰየ፤ ወነደ እሳት ላዕለ ያዕቆብ ወመጽአ መቅሠፍት ላዕለ እስራኤል።
፳፮ እስመ ኢተአመንዎ ለእግዚአብሔር፤ ወኢተወከሉ በአድኅኖቱ።
፳፯ ወአዘዘ ደመና በላዕሉ፤ ወአርኀወ ኆኃተ ሰማይ።
፳፰ ወአዝነመ ሎሙ መና ይብልዑ፤ ወወሀቦሙ ኅብስተ ሰማይ።
፳፱ ወኅብስተ መላእክቲሁ በልዑ እጓለ እመሕያው፤ ወፈነወ ሎሙ ሥንቆሙ ዘየአክሎሙ።
፴ ወአንሥአ አዜበ እምሰማይ፤ ወአምጽአ መስዐ በኀይሉ።
፴፩ ወአዝነመ ላዕሌሆሙ ሥጋ ከመ መሬት፤ ወከመ ኆጻ ባሕር አዕዋፈ ዘይሠርር።
፴፪ ወወድቀ ማእከለ ተዓይኒሆሙ፤ ወዐውደ ደባትሪሆሙ።
፴፫ በልዑ ወጸግቡ ጥቀ፤ ወወሀቦሙ ለፍትወቶሙ። ወኢያኅጥኦሙ እምዘ ፈቀዱ።
፴፬ ወእንዘ ዓዲ መብልዖሙ ውስተ አፉሆሙ፤ ወመጽአ መቅሠፍተ እግዚአብሔር ላዕሌሆሙ
፴፭ ወቀተሎሙ መብዝኅቶሙ፤ ወአዕቀጾሙ ለኅሩያነ እስራኤል።
፴፮ ወምስለ ዝኒ ዓዲ አበሱ ሎቱ፤ ወኢተአመንዎ በተአምሪሁ።
፴፯ ወኀልቀ በከንቱ መዋዕሊሆሙ፤ ወኀለፈ በጕጕኣ ዐመቲሆሙ።
፴፰ ወአመ ይቀትሎሙ ውእተ አሚረ ይኀሥዎ፤ ወይትመየጡ ወይገይሱ ኀበ እግዚአብሔር።
፴፱ ወተዘከሩ ከመ እግዚአብሔር ውእቱ ረዳኢሆሙ፤ ወእግዚአብሔር ልዑል መድኀኒሆሙ።
፵ ወአፍቀረዎ በአፉሆሙ፤ ወሐሰውዎ በልሳኖሙ።
፵፩ ወኢኮነ ርቱዐ ልቦሙ በላዕሌሆሙ፤ ወኢተአመንዎ በኪዳኑ።
፵፪ ወውእቱሰ መሓሪ ውእቱ ወይሰሪ ሎሙ ኵሎ ኃጢአቶሙ ወኢያጠፍኦሙ።
፵፫ ወያበዝኅ መዪጠ መዐቱ ወኢያነድድ በኵሉ መቅሠፍቱ።
፵፬ ወተዘከረ ከመ ሥጋ እሙንቱ፤ መንፈስ እምከመ ወፅአ ኢይገብእ።
፵፭ ሚመጠነ አምዕዕዎ በገዳም ወወሐክዎ በበድው።
፵፮ ወተመይጡ ወአመከርዎ ለእግዚአብሔር፤ ወወሐክዎ ለቅዱሰ እስራኤል።
፵፯ ወኢተዘከሩ እዴሁ፤ ዘአድኀኖሙ እምእደ ፀሮሙ።
፵፰ ዘገብረ ተአምረ በግብጽ፤ ወመንክረ በሐቅለ ጣኔዎስ።
፵፱ ወረሰየ ደመ ለአፍላጊሆሙ፤ ወለአንቅዕቲሆሙኒ ከመ ኢይስተዩ።
፶ ፈነወ ላዕሌሆሙ አኮተ ወበልዖሙ፤ ወቈርነነዓተ ወአርኰሶሙ።
፶፩ ወወሀበ ለአናኵዕ ፍሬሆሙ፤ ወተግባሮሙኒ ለአንበጣ።
፶፪ ወቀተለ ወይኖሙ በበረድ፤ ወበለሶሙኒ በአስሐትያ።
፶፫ ወወሀበ ለበረድ እንስሳሆሙ፤ ወንዋዮሙኒ ለእሳት።
፶፬ ፈነወ ላዕሌሆሙ መቅሠፍተ መዐቱ፤ መቅሠፍተ ወመንሱተ ወሕማመ፤ ወፈነወ ምስለ መላእክት እኩያን።
፶፭ ወጼሐ ፍኖተ ለመዐቱ፤ ወኢመሐካ እሞት ለነፍሶሙ፤ ወዐጸወ ውስተ ሞት እንስሳሆሙ።
፶፮ ወቀተለ ኵሎ በኵሮሙ በምድረ ግብጽ፤ ወቀዳሜ ኵሎ ጻማሆሙ በውስተ አብያቲሆሙ።
፶፯ ወአውፈሮሙ ከመ አባግዕ ለሕዝቡ፤ ወአውፅኦሙ ገዳመ ከመ መርዔት።
፶፰ ወመርሖሙ በተስፋሁ ወኢፈርሁ፤ ወደፈኖሙ ባሕር ለፀሮሙ።
፶፱ ወወሰዶሙ ደብረ መቅደሱ፤ ደብረ ዘፈጠረት የማኑ።
፷ ወሰደደ አሕዛበ እምቅድመ ገጾሙ ወአውረሶሙ በሐብለ ርስቱ፤
፷፩ ወአንበረ ውስተ አብያቲሆሙ ሕዝበ እስራኤል።
፷፪ ወአመከርዎ ወአምዕዕዎ ለእግዚአብሔር ልዑል፤ ወኢዐቀቡ ስምዖ።
፷፫ ወተመይጡ ወዐለዉ ከመ አበዊሆሙ፤ ወኮኑ ከመ ቀስት ጠዋይ።
፷፬ ወአምዕዕዎ በአውገሪሆሙ፤ ወኣቅንእዎ በግልፎሆሙ።
፷፭ ወሰምዐ እግዚአብሔር ወአናሕሰየ፤ ወመነኖሙ ለእስራኤል ፈድፋደ።
፷፮ ወኀደጋ ለደብተራ ሴሎም፤ ደብተራሁ እንተ ባቲ ኀደረ ምስለ ሰብእ።
፷፯ ወወሀበ ኀይሎሙ ለተፄውዎ፤ ወሥኖሙኒ ውስተ እደ ፀሮሙ።
፷፰ ወዐጸዎሙ ውስተ ኲናት ለሕዝቡ፤ ወተሀየዮሙ ለርስቱ።
፷፱ ወበልዐቶሙ እሳት ለወራዙቶሙ፤ ወኢላሐዋ ደናግሊሆሙ።
፸ ወካህናቲሆሙኒ ወድቁ በኲናት፤ ወኢበከያ አቤራቲሆሙ።
፸፩ ወተንሥአ እግዚአብሔር ከመ ዘንቃህ እምንዋም፤ ወከመ ኀያል ወኅዳገ ወይን።
፸፪ ወቀተለ ፀሮሙ በዳኅሬሆሙ፤ ወወሀቦሙ ኀሳረ ዘለዓለም።
፸፫ ወኀደጋ ለደብተራ ዮሴፍ፤ ወኢኀረዮሙ ለሕዝበ ኤፍሬም።
፸፬ ወኀረየ ለሕዝበ ይሁዳ፤ ደብረ ጽዮን ዘአፍቀረ።
፸፭ ሐነጸ መቅደሶ በአርያም፤ ወሳረራ ውስተ ምድር ለዓለም።
፸፮ ወኀረዮ ለዳዊት ገብሩ፤ ወነሥኦ እመርዔተ አባግዒሁ። ወተመጠዎ እምድኅረ ሐራሣት፤
፸፯ ከመ ይርዐዮ ለያዕቆብ ገብሩ፤ ወለእስራኤል ርስቱ።
፸፰ ወርዕዮሙ በየዋሃተ ልቡ፤ ወመርሖሙ በጥበበ እደዊሁ።