መዝሙረ ዳዊት85
መዝሙረ ዳዊት ምዕራፍ ፹፭ ፍጻሜ ዘደቂቀ ቆሬ መዝሙር ጸሎት ዘዳዊት።
፩ ተሣሀልከ እግዚኦ ምድረከ፤ ወሜጥከ ፄዋሁ ለያዕቆብ።
፪ ወኀደገ ኃጢአቶሙ ለሕዝብከ፤ ወከደንከ ኵሎ አበሳሆሙ።
፫ ወኀደገ ኵሎ መዐትከ። ወሜጥከ መቅሠፍተ መዐተከ።
፬ ሚጠነ አምላክነ ወመድኀኒነ፤ ወሚጥ መዐተከ እምኔነ።
፭ ወለዓለምሰ ኢትትመዐዐነ። ወኢታኑኅ መዐተከ ላዕለ ትውልደ ትውልድ።
፮ አንተ አምላክነ ተመየጠነ ወኣሕይወነ፤ ወሕዝብከኒ ይትፌሥሑ ብከ።
፯ አርእየነ እግዚኦ ሣህለከ፤ ወሀበነ አምላክነ አድኅኖተከ።
፰ ኣፀምእ ዘይነበኒ እግዚአብሔር አምላኪየ፤ እስመ ይነብብ ሰላመ ላዕለ ሕዝቡ
፱ ላዕለ ጻድቃኑ ወላዕለ እለ ይመይጡ ልቦሙ ኀቤሁ።
፲ ወባሕቱ ቅሩብ አድኅኖቱ ለእለ ይፈርህዎ፤ ከመ ይኅድር ስብሐቲሁ ውስተ ምድርነ።
፲፩ ሣህል ወርትዕ ተራከባ፤ ጽድቅ ወሰላም ተሳዐማ።
፲፪ ርትዕሰ እምድር ሠረጸት፤ ወጽድቅኒ እምሰማይ ሐወጸ።
፲፫ ወእግዚአብሔርኒ ይሁብ ምሕረቶ፤ ወምድርኒ ትሁብ ፍሬሃ።
፲፬ ጽድቅ የሐውር ቅድሜሁ፤ ወየኀድግ ውስተ ፍኖት አሰሮ።