መዝሙረ ዳዊት102
መዝሙረ ዳዊት ምዕራፍ ፻፪ ጸሎት ባሕታዊ ሶበ ይቴክዝ፤ ወይክዑ ቅድመ እግዚአብሔር ኵሎ ስእለቶ።
፩ ስምዐኒ እግዚኦ ጸሎትየ፤ ወይብጻሕ ቅድሜከ ገዐርየ።
፪ ወኢትሚጥ ገጸከ እምኔየ በዕለተ መንዳቤየ፤
፫ አፅምእ እዝነከ ኀቤየ አመ ዕለተ እጼውዐከ ፍጡነ ስምዐኒ።
፬ እስመ ኀልቀ ከመ ጢስ መዋዕልየ፤ ወነቅጸ ከመ ሣዕር አዕጽምትየ።
፭ ተቀሠፍኩ ወየብሰ ከመ ሣዕር ልብየ፤ እስመ ተረስዐኒ በሊዐ እክል።
፮ እምቃለ ገዐርየ ጠግዐ ሥጋየ ዲበ አዕጽምትየ።
፯ ወኮንኩ ከመ አዱገ መረብ ዘገዳም፤ ወኮንኩ ከመ ጉጓ ውስተ ቤት ሌሊተ።
፰ ተጋህኩ ወኮንኩ ከመ ዖፍ ባሕታዊ ውስተ ናሕስ።
፱ ኵሎ አሚረ ይጼእሉኒ ጸላእትየ፤ ወእለኒ ይሰዱኒ ይሰካትዩ ላዕሌየ።
፲ እስመ ሐመደ ከመ እክል ቀማሕኩ፤ ወስቴየኒ ምስለ አንብዕየ ሰተይኩ።
፲፩ እምገጸ መቅሠፍተ መዐትከ፤ እስመ አንሣእከኒ ወነፃኅከኒ።
፲፪ ወመዋዕልየኒ ከመ ጽላሎት ኀለፈ፤ ወአነሂ ከመ ሣዕር የበስኩ።
፲፫ ወአንተሰ እግዚኦ ለዓለም ትነብር፤ ወዝክርከኒ ለትውልደ ትውልድ።
፲፬ ተንሥእ እግዚኦ ወተሣሀለ ለጽዮን፤ እስመ ጊዜሃ ውእቱ ከመ ተሣሀላ ወበጽሐ ዕድሜሃ።
፲፭ እስመ ሠምሩ አግብርቲከ እበኒሃ፤ ወአክበርዎ ለመሬታ።
፲፮ ወይፍርሁ አሕዛብ ስመከ እግዚኦ፤ ወኵሎሙ ነገሥት ለስብሐቲከ።
፲፯ እስመ የሐንጻ እግዚአብሔር ለጽዮን፤ ወያስተርኢ በስብሐቲሁ።
፲፰ ወነጸረ ላዕለ ጸሎተ ነዳይ፤ ወኢተቈጥዐ ስእለቶሙ።
፲፱ ወተጽሕፈት ዛቲ ለካልእ ትውልድ፤ ወሕዝብ ዘይትፈጠር ይሴብሖ ለእግዚአብሔር።
፳ እስመ ሐወጸ እምሰማየ መቅደሱ፤ እግዚአብሔር ሐወጸ እምሰማይ ዲበ ምድር።
፳፩ ከመ ይስማዕ ገዐሮሙ ለሙቁሓን፤ ወከመ ያሕይዎሙ ለደቂቀ ቅቱላን።
፳፪ ከመ ይንግሩ በጽዮን ስመ እግዚአብሔር፤ ወስብሐቲሁኒ በኢየሩሳሌም።
፳፫ ሶበ ተጋብኡ አሕዛብ ኅቡረ፤ ወነገሥትኒ ከመ ይትቀነዩ ለእግዚአብሔር።
፳፬ ወተሠጥዎሙ በፍኖተ ኀይሉ፤ ንግረኒ ውሕዶን ለመዋዕልየ።
፳፭ ወኢትሰደኒ በመንፈቀ ዐመትየ። ለትውልደ ትውልድ ዐመቲከ።
፳፮ አንተ እግዚኦ አቅደምከ ሳርሮታ ለምድር፤ ወግብረ እደዊከ እማንቱ ሰማያት።
፳፯ እማንቱሰ ይትሐጐላ ወአንተሰ ትሄሉ፤ ወኵሉ ከመ ልብስ ይበሊ፤
፳፰ ወከመ ሞጣሕት ትዌልጦሙ ወይትዌለጡ። ወአንተሰ አንተ ክመ፤ ወዐመቲከኒ ዘኢየኀልቅ።
፳፱ ወደቂቀ አግብርቲከ ይነብርዋ፤ ወዘርዖሙኒ ለዓለም ይጸንዕ።