መዝሙረ ዳዊት107
መዝሙረ ዳዊት ምዕራፍ ፻፯ ሀሌሉያ።
፩ ግነዩ ለእግዚአብሔር እስመ ኄር፤ እስመ ለዓለም ምሕረቱ።
፪ ለይበሉ እለ አድኀኖሙ እግዚአብሔር፤ እለ አድኀኖሙ እምእደ ፀሮሙ። ወአስተጋብኦሙ እምበሓውርት፤
፫ እምጽባሕ ወእምዐረብ ወመስዕ ወባሕር።
፬ ወሳኰዩ ውስተ በድው ዘአልቦ ማየ፤ ወኢረከቡ ፍኖተ ሀገረ ብሔሮሙ።
፭ ጸምኡ ወርኅቡ፤ ወኀልቀት ነፍሶሙ በላዕሌሆሙ።
፮ ወዐውየዉ ኀበ እግዚአብሔር ሶበ ተመንደቡ፤ ወአድኀኖሙ እምንዳቤሆሙ።
፯ ወመርሖሙ ፍኖተ ርቱዐ፤ ከመ ይሖሩ ፍኖተ ሀገሮሙ።
፰ ንግሩ ለእግዚአብሔር ምሕረቶ፤ ወመንክሮሂ ለእጓለ እመሕያው።
፱ እስመ አጽገበ ነፍሰ ርኅብተ፤ ወመልአ ነፍሰ ዕራቃ በረከተ።
፲ ለእለ ይነብሩ ውስተ ጽልመት ወጽላሎተ ሞት፤ ወመቁሓን በንዴት ወበኀጺን።
፲፩ እስመ አምረሩ ቃለ እግዚአብሔር፤ ወአምዕዑ ምክረ ልዑል።
፲፪ ወሰርሐ በሕማም ልቦሙ፤ ደወዩ ወኀጥኡ ዘይቀብሮሙ።
፲፫ ወዐውየዉ ኀበ እግዚአብሔር ሶበ ተመንደቡ፤ ወአድኀኖሙ እምንዳቤሆሙ።
፲፬ ወአውፅኦሙ እምጽልመት ወጽላሎተ ሞት፤ ወሰበረ መዋቅሕቲሆሙ።
፲፭ ንግሩ ለእግዚአብሔር ምሕረቶ፤ ወመንክሮሂ ለእጓለ እመሕያው።
፲፮ እስመ ሰበረ ኆኃተ ብርት፤ ወቀጥቀጠ መናስግተ ኀጺን።
፲፯ ወተወክፎሙ እምፍኖተ ጌጋዮሙ፤ እስመ ሐሙ በኃጢአቶሙ።
፲፰ ወኵሎ መብልዐ አስቆረረት ነፍሶሙ፤ ወቀርቡ ኀበ አናቅጸ ሞት።
፲፱ ወዐውየዉ ኀበ እግዚአብሔር ሶበ ተመንደቡ፤ ወአድኀኖሙ እምንዳቤሆሙ።
፳ ወፈነወ ቃሎ ወአሕየዎሙ፤ ወአድኀኖሙ እሞቶሙ።
፳፩ ንግሩ ለእግዚአብሔር ምሕረቶ፤ ወመንክሮሂ ለእጓለ እመሕያው።
፳፪ ወይሡዑ ሎቱ መሥዋዕተ ስብሐት፤ ወይንግሩ ግብሮ በትፍሥሕት።
፳፫ እለ ይወርዱ ውስተ ባሕር በአሕማር፤ ወይትጌበሩ ተግባሮሙ ውስተ ማይ ብዙኅ።
፳፬ እሙንቱሰ ያአምሩ ግብረ እግዚአብሔር፤ ወመንክሮሂ በውስተ ልጐት።
፳፭ ይቤ ወመጽአ መንፈሰ ዐውሎ፤ ወተለዐለ ማዕበል።
፳፮ የዐርጉ እስከ ሰማይ ወይወርዱ እስከ ቀላይ፤ ወተመስወት ነፍሶሙ በሕማም።
፳፯ ደንገፁ ወተሀውኩ ከመ ስኩር፤ ወተሰጥመ ኵሉ ጥበቦሙ።
፳፰ ወዐውየዉ ኀበ እግዚአብሔር ሶበ ተመንደቡ፤ ወአድኀኖሙ እምንዳቤሆሙ።
፳፱ ወአጥፍኦ ለዐውሎ ወአርመመ ባሕር፤ ወአርመመ ማዕበል።
፴ ወተፈሥሑ እስመ አዕረፉ፤ ወመርሖሙ ውስተ መርሶ ኀበ ፈቀዱ።
፴፩ ንግሩ ለእግዚአብሔር ምሕረቶ፤ ወመንክሮሂ ለእጓለ እመሕያው።
፴፪ ወያዐብይዎ በማኅበረ አሕዛብ፤ ወይሴብሕዎ በመንበረ ሊቃውንት።
፴፫ ወረሰዮሙ ለአፍላግ በድወ፤ ወረሰየ ምጽማአ ሙሓዘ ማይ።
፴፬ ወረሰየ ጼወ ለምድር እንተ ትፈሪ፤ በእከዮሙ ለእለ ይነብርዋ።
፴፭ ወረሰዩ ለበድው ሙሓዘ ማይ፤ ወለምድረ በድው ቀላያተ ማያት።
፴፮ ወአንበረ ህየ ርኁባነ፤ ወሐነጹ አህጉረ ኀበ ይነብርዋ።
፴፯ ወዘርዑ ገራውሀ ወተከሉ ወይነ፤ ወገብሩ ማእረረ እክል።
፴፰ ወባረኮሙ ወበዝኁ ፈድፋደ፤ ወኢያውኀደ ሎሙ እንስሳሆሙ።
፴፱ ወደወዩ ወውኅዱ፤ በሕማም እኩይ ወበጻዕር።
፵ ወተክዕወ ኀሳር ዲበ መላእክት፤ ወአስሐቶሙ ውስተ በድው ዘኢኮነ ፍኖተ።
፵፩ ወረድኦ ለነዳይ በተጽናሱ፤ ወረሰዮ ከመ አባግዐ ብሔር።
፵፪ ይርአዩ ራትዓን ወይትፌሥሑ፤ ወትትፈፀም አፉሃ ኵላ ዐመፃ።
፵፫ መኑ ጠቢብ ዘየዐቅቦ ለዝ፤ ወያአምር ከመ መሓሪ እግዚአብሔር።