መዝሙረ ዳዊት135
መዝሙረ ዳዊት ምዕራፍ ፻፴፭ ሀሌሉያ።
፩ ሰብሑ ለስመ እግዚአብሔር፤ ሰብሕዎ አግብርቲሁ ለእግዚአብሔር።
፪ እለ ትቀውሙ ውስተ ቤተ እግዚአብሔር፤ ውስተ ዐጸደ ቤተ አምላክነ።
፫ ሰብሕዎ ለእግዚአብሔር እስመ ኄር እግዚአብሔር፤ ወዘምሩ ለስሙ እስመ ሠናይ።
፬ እስመ ለያዕቆብ ኀረዮ እግዚአብሔር፤ ወለእስራኤልኒ ሎቱ ለርስቱ።
፭ እስመ አነ ኣእመርኩ ከመ ዐቢይ እግዚአብሔር፤ ወአምላክነሂ እምኵሉ አማልክት።
፮ ኵሎ ዘፈቀደ ገብረ እግዚአብሔር፤ በሰማይኒ ወበምድርኒ፤ በባሕርኒ ወበኵሉ ቀላያት።
፯ ያዐርግ ደመናተ እምአጽናፈ ምድር፤ ወገብረ መብረቀ ለጊዜ ዝናም።
፰ ዘያወፅኦሙ ለነፋሳት እመዛግብቲሆሙ። ዘቀተለ ኵሎ በኵሮሙ ለግብጽ፤ እምሰብእ ወእስከ እንስሳ።
፱ ፈነወ ተኣምረ ወመንክረ ማእከሌኪ ግብጽ፤ ላዕለ ፈርዖን ወላዕለ አግብርቲሁ።
፲ ዘቀተለ አሕዛበ ብዙኃነ፤ ወቀተለ ነገሥተ ጽኑዓነ፤
፲፩ ለሴዎን ንጉሠ አሞሬዎን ወለዖግ ንጉሠ ባሳን፤ ወለኵሎሙ ነገሥተ ከናዐን።
፲፪ ወወሀበ ምድሮሙ ርስተ፤ ርስተ እስራኤል ገብሩ።
፲፫ ስምኬ እግዚኦ ለዓለም፤ ወዝክርከኒ ለትውልደ ትውልድ።
፲፬ እስመ ይኴንን እግዚአብሔር ሕዝቦ፤ ወይትናበብ በእንተ አግብርቲሁ።
፲፭ አማልክቲሆሙ ለአሕዛብ ዘወርቅ ወብሩር፤ ግብረ እደ እጓለ እመሕያው።
፲፮ አፈ ቦሙ ወኢይነቡ፤ አዕይንተ ቦሙ ወኢይሬእዩ።
፲፯ እዝነ ቦሙ ወኢይሰምዑ፤ አንፈ ቦሙ ወኢያጼንዉ። እደ ቦሙ ወኢይገሱ፤ እግረ ቦሙ ወኢየሐውሩ፤ ወኢይነቡ በጐራዒቶሙ። ወአልቦሙ መንፈሰ ውስተ አፉሆሙ።
፲፰ ከማሆሙ ለይኩኑ ኵሎሙ እለ ገብርዎሙ፤ ወኵሎሙ እለ ይትአመኑ ቦሙ።
፲፱ ቤተ እስራኤል ባርክዎ ለእግዚአብሔር፤ ቤተ አሮን ባርክዎ ለእግዚአብሔር።
፳ ቤተ ሌዊ ባርክዎ ለእግዚአብሔር፤ እለ ትፈርህዎ ለእግዚአብሔር ባርክዎ ለእግዚአብሔር።
፳፩ ቡሩክ እግዚአብሔር በጽዮን፤ ዘየኀድር ውስተ ኢየሩሳሌም።