መዝሙረ ዳዊት140
መዝሙረ ዳዊት ምዕራፍ ፻፵ ፍጻሜ መዝሙር ዘዳዊት።
፩ አድኅነኒ እግዚኦ እምብእሲ እኩይ፤ ወእምሰብእ ዐመፂ ባልሐኒ።
፪ እለ ዐመፃ መከሩ በልቦሙ፤ ኵሎ አሚረ ይረውዱኒ ይቅትሉኒ።
፫ ወአብልኁ ልሳኖሙ ከመ አርዌ ምድር፤ ሕምዘ አርዌ ምድር ታሕተ ከናፍሪሆሙ።
፬ ዕቅበኒ እግዚኦ እምእደ ኃጥኣን ወእምብእሲ ዐመፂ አድኅነኒ፤
፭ እለ መከሩ ያዕቅጹ መከየድየ። ወኀብኡ ሊተ መሥገርተ ዕቡያን፤
፮ ወሠተሩ አሕባለ መሣግር ለእገርየ፤ ወአንበሩ ዕቅፍተ ውስተ ፍኖትየ።
፯ ወእቤሎ ለእግዚአብሔር አምላኪየ አንተ፤ ወአፅምአኒ ቃለ ስእለትየ።
፰ እግዚኦ እግዚኦ ኀይለ መድኀኒትየ፤ ሰወርከኒ በዕለተ ቀትል መልዕልተ ርእስየ።
፱ ኢትመጥወኒ እግዚኦ እምፍትወትየ ለኃጥኣን፤ ተማከሩ ላዕሌየ ወኢትኅድገኒ ከመ ኢይዘሀሩ።
፲ ርእሰ ማዕገቶሙ ወጻማ ከናፍሪሆሙ ይድፍኖሙ።
፲፩ ወይደቅ ላዕሌሆሙ አፍሓመ እሳት፤ ትንፅኆሙ ውስተ ምድር በምንዳበ ከመ ኢይክሀሉ ቀዊመ።
፲፪ ብእሲ ነባቢ ኢያረትዕ በዲበ ምድር፤ ወለብእሲ ዐማፂ ትንዕዎ እኪት ለአማስኖ።
፲፫ ኣእመርኩ ከመ ይገብር እግዚአብሔር ኵነኔ ለነዳያን፤ ወፍትሐ ለምስኪናን።
፲፬ ወባሕቱ ጻድቃን ይገንዩ ለስምከ፤ ወይነብሩ ራትዓን ቅድመ ገጽከ።