መዝሙር 8
መዝሙራት ዘዳዊት ምዕራፍ ፰ ፍጻሜ በእንተ መክብብት፤ መዝሙር ዘዳዊት።
፩ እግዚኦ እግዚእነ ጥቀ ተሰብሐ ስምክ በኵሉ ምድር፤
፪ እስመ ተለዐለ እበየ ስብሓቲከ መልዕልተ ሰማያት።
፫ እምአፈ ደቂቅ ወሕፃናት አስተዳሉከ ስብሐተ በእንተ ጸላኢ፤ ከመ ትንሥቶ ለጸላኢ ወለገፋዒ።
፬ እስመ ንሬኢ ሰማያተ ግብረ አጻብዒከ፤ ወርኀ ወከዋክብተ ዘለሊከ ሳረርከ።
፭ ምንትኑ ውእቱ ሰብእ ከመ ትዝክሮ፤ ወምንትኑ እጓለ እመሕያው ከመ ተሐውጾ።
፮ ሕቀ አሕጸጽኮ እምላእክቲከ፤ ክብረ ወስብሐተ ከለልኮ። ወሢምኮ ዲበ ኵሉ ግብረ እደዊከ፤
፯ ወኵሎ አግረርከ ሎቱ ታሕተ እገሪሁ። አባግዐኒ ወኵሎ አልህምተ፤ ወዓዲ እንስሳ ዘገዳም።
፰ አዕዋፈ ሰማይኒ ወዐሣተ ባሕር፤ ወዘኒ የሐውር ውስተ ፍኖተ ባሕር።
፱ እግዚኦ እግዚእነ ጥቀ ተሰብሐ ስምከ በኵሉ ምድር።