መዝሙር 14
መዝሙራት ዘዳዊት ምዕራፍ ፲፬ ፍጻሜ መዝሙር ዘዳዊት።
፩ ይብል አብድ በልቡ አልቦ እግዚአብሔር፤
፪ ኀስሩ ወረኵሱ በምግባሪሆሙ፤ አልቦ ዘይገብራ ለሠናይት አልቦ ወኢአሐዱ።
፫ እግዚአብሔር ሐወጸ እምሰማይ ላዕለ እጓለ እምሕያው፤ ከመ ይርአይ እመቦ ጠቢበ ዘየኀሦ ለእግዚአብሔር።
፬ ኵሉ ዐረየ ወኅቡረ ዐለወ፤ አልቦ ዘይገብራ ለሠናይት አልቦ ወኢአሐዱ።
፭ ከመ መቃብር ክሡት ጐራዒቶሙ ወጸልሐዉ በልሳናቲሆሙ ሕምዘ አርዌ ምድር ታሕተ ከነፍሪሆሙ።
፮ መሪር አፋሆሙ ወምሉእ መርገም፤ በሊኅ እገሪሆሙ ለክዒወ ደም።
፯ ኀሳር ወቅጥቃጤ ውስተ ፍኖቶሙ፤ ወኢያአምርዋ ለፍኖተ ሰላም። ወአልቦ ፍርሀተ እግዚአብሔር ቅድመ አዕይንቲሆሙ።
፰ ወኢያአምሩ ኵሎሙ ገበርተ ዐመፃ፤ እለ ይውኅጥዎሙ ለሕዝብየ ከመ በሊዐ እክል።
፱ ወለእግዚአብሔርሰ ኢጸውዕዎ። ወበህየ ፈርሁ ወገረሞሙ ዘኢኮነ ግሩመ፤
፲ እስመ እግዚአብሔር ውስተ ትውልደ ጻድቃን። ወአስተኀፈርክሙ ምክረ ነዳይ፤ እስመ እግዚአብሔር ተስፋሆሙ ውእቱ።
፲፩ መኑ ይሁብ መድኀኒተ እምጽዮን ለእስራኤል። አመ ሜጠ እግዚአብሔር ፄዋ ሕዝቡ፤ ይትፌሣሕ ያዕቆብ ወይትሐሠይ እስራኤል።