መዝሙር 20
መዝሙራት ዘዳዊት ምዕራፍ ፳ ፍጻሜ መዝሙር ዘዳዊት።
፩ ይስማዕከ እግዚአብሔር በዕለተ ምንዳቤከ፤ ወይቁም ለከ ስሙ ለአምላከ ያዕቆብ።
፪ ወይፈኑ ለከ ረድኤተ እምቅደሱ፤ ወእምጽዮን ይትወከፍከ።
፫ ወይዝክር ለከ ኵሎ መሥዋዕተከ፤ ወያጥልል ለከ ቍርባነከ።
፬ የሀብክ እግዚአብሔር ዘከመ ልብከ፤ ወይፈጽም ለከ ኵሎ ሥምረተከ።
፭ ወንትፌሣሕ በአድኅኖትከ ወነዐቢ በስመ እግዚአብሔር አምላክነ፤
፮ ወይፈጽም ለከ እግዚአብሔር ኵሎ ስእለተከ። ይእዜ ኣእመርኩ ከመ አድኀኖ እግዚአብሔር ለመሲሑ።
፯ ወይሠጠዎ እምሰማይ ወቅደሱ፤ በኀይለ አድኅኖተ የማኑ።
፰ እሙንቱሰ በአፍራስ ወበሰረገላት፤ ወንሕነሰ ነዐቢ በስመ እግዚአብሔር አምላክነ።
፱ እሙንቱሰ ተዐቅጹ ወወድቁ፤ ወንሕነሰ ተንሣእነ ወረታዕነ።
፲ እግዚኦ አድኅኖ ለንጉሥ ወስምዐነ በዕለተ ንጼውዐከ።