መዝሙር 28
መዝሙራት ዘዳዊት ምዕራፍ ፳፰ መዝሙር ዘዳዊት።
፩ ኀቤከ እግዚኦ ጸራኅኩ አምላኪየ ወኢተጸመመኒ፤ ወእመሰ ተጸመመከኒ እከውን ከመ እለ የወርዱ ውስተ ግብ።
፪ ስምዐኒ እግዚኦ ቃለ ስእለትየ ዘጸራኅኩ ኀቤከ ሶበ ኣንሥእ እደውየ በጽርሐ መቅደስከ።
፫ ኢትስሐባ ምስለ ኃጥኣን ለነፍስየ ወኢትግድፈኒ ምስለ ገበርተ ዐመፃ።
፬ እለ ይትናገሩ ሰላመ ምስለ ቢጾሙ፤ ወእኩይ ውስተ ልቦሙ።
፭ ሀቦሙ በከመ ምግባሮሙ ወበከመ እከየ ሕሊናሆሙ።
፮ ፍድዮሙ በከመ ግብረ እደዊሆሙ፤ ፍድዮሙ ፍዳሆሙ ላዕለ ርእሶሙ።
፯ እስመ ኢሐለዩ ውስተ ግብረ እግዚአብሔር ወኢውስተ ግብረ እደዊሁ፤ ንሥቶሙ ወኢትሕንጾሙ።
፰ ይትባረክ እግዚአብሔር እስመ ሰምዐኒ ቃለ ስእለትየ።
፱ እግዚአብሔር ረዳእየ ወምእመንየ ቦቱ ተወከለ ልብየ ወይረድአኒ።
፲ ወሠረጸ ሥጋየ፤ ወእምፈቃድየ አአምኖ።
፲፩ እግዚአብሔር ኀይሎሙ ውእቱ ለሕዝቡ፤ ወምእመነ መድኀኒተ መሲሑ ውእቱ።
፲፪ አድኅን ሕዝበከ ወባርክ ርስተከ፤ ረዐዮሙ ወአልዕሎሙ እስከ ለዓለም።