መዝሙር 38
መዝሙራት ዘዳዊት ምዕራፍ ፴፰ መዝሙር ዘዳዊት ለተዝካረ ሰንበት።
፩ እግዚኦ በመዐትከ ኢትቅሥፈኒ፤ ወበመቅሠፍትከ ኢትገሥጸኒ።
፪ እስመ አሕጻከ ደጐጻኒ፤ ወአጽናዕከ እዴከ ላዕሌየ።
፫ ወአልቦ ፈውሰ ለሥጋየ እምገጸ መዐትከ፤ ወአልቦ ሰላመ ለአዕጽምትየ እምገጸ ኀጢአትየ።
፬ እስመ ኖኀ እምሥዕርትየ ጌጋይየ፤ ከመ ጾር ክብድ ከብደ ላዕሌየ።
፭ ጼአ ወባኍብኈ አዕጽምትየ እምገጸ እበድየ።
፮ ሐርተምኩ ወተቀጻዕኩ ለዝሉፉ፤ ወኵሎ አሚረ ትኩዝየ ኣንሶሱ።
፯ እስመ ጸግበት ጽእለተ ነፍስየ፤ ወኀጣእኩ ፈውሰ ለሥጋየ።
፰ ደወይኩ ወሐመምኩ ፈድፋደ፤ ወእጐሥዕ እምሐዘነ ልብየ።
፱ በቅድሜከ ኵሉ ፍትወትየ፤ ወገዓርየኒ ኢይትኀባእ እምኔከ።
፲ ልብየኒ ደንገፀኒ ወኀይልየኒ ኀደገኒ፤ ወብርሃነ አዕይንትየኒ ለከወኒ።
፲፩ አዕርክትየኒ ወቢጽየኒ ዕድወ ኮኑኒ ሮዱኒ ወደበዩኒ፤
፲፪ ወአዝማድየኒ ቀብፁኒ ወተናከሩኒ። ወተኀየሉኒ እለ የኀሥሥዋ ለነፍስየ፤
፲፫ ወእለኒ ይፈቅዱ ሕማምየ ነበቡ ከንቶ፤ ወኵሎ አሚረ ይመክሩ በቍፅር ያመነስዉኒ።
፲፬ ወአንሰ ከመ ጽሙም ዘኢይሰምዕ፤ ወከመ በሃም ዘኢይከሥት አፉሁ።
፲፭ ወኮንኩ ከመ ብእሲ ዘኢይሰምዕ፤ ወከመ ዘኢይክል ተናግሮ በአፉሁ።
፲፮ እስመ ኪያከ ተወከልኩ እግዚኦ፤ አንተ ስምዐኒ እግዚኦ አምላኪየ።
፲፯ እስመ እቤ ኢትረስየኒ ስላተ ጸላእየ፤ ወእመኒ ድኅፀ ሰኰናየ ያዐብዩ አፉሆሙ ላዕሌየ።
፲፰ እስመ ሊተሰ አጽንሑኒ ይቅሥፉኒ፤ ወቍስልየኒ ቅድሜየ ውእቱ በኵሉ ጊዜ።
፲፱ ወእነግር ጌጋይየ፤ ወእቴክዝ በእንተ ኀጢአትየ።
፳ ጸላእትየሰ ሕያዋን ወይኄይሉኒ፤ ወበዝኁ እለ በዐመፃ ይጸልኡኒ።
፳፩ እለ ይፈድዩኒ እኪተ ህየንተ ሠናይት ወያስተዋድዩኒ በተሊወ ጽድቅ። ወገደፉ እኅዋሆሙ ከመ በድን ርኩስ።
፳፪ አንተ ኢትግድፈኒ እግዚኦ አምላኪየ ወኢትርሕቅ እምኔየ። ወነጽር ውስተ ረዱኦትየ፤ እግዚኦ አምላከ መድኀኒትየ።