መዝሙር 40
መዝሙራት ዘዳዊት ምዕራፍ ፵ ፍጻሜ መዝሙር ዘዳዊት።
፩ ጸኒሐ ጸናሕክዎ ለእግዚአብሔር፤ ሰምዐኒ ወተመይጠኒ
፪ ወሰምዐኒ ቃለ ስእለትየ። ወአውፅአኒ እምዐዘቅተ ሕርትምና ወእምጽብረ ዐምዓም፤
፫ ወአቀሞኒ ውስተ ኰኵሕ ለእገርየ ወአጽንዖኒ ለመካይድየ።
፬ ወወደየ ውስተ አፉየ ስብሓተ ሐዲሰ ስብሓቲሁ ለአምላክነ፤
፭ ይርአዩ ብዙኃን ወይፍርሁ፤ ወይትወከሉ በእግዚአብሔር።
፮ ብፁዕ ብእሲ ዘስመ እግዚአብሔር ትውክልቱ፤ ወዘኢነጸረ ውስተ ከንቱ ውስተ መዐት ወሐሰት።
፯ ብዙኀ ገበርከ እግዚኦ አምላኪየ መንክረከ ወአልቦ ዘይመስሎ ለሕሊናከ፤
፰ አይደዕኩ ወነገርኩ ወበዝኃ እምኈልቍ።
፱ መሥዋዕተ ወቍርባነ ኢፈቀድከ ሥጋሰ አንጽሕ ሊተ፤
፲ መሥዋዕተ ዘበእንተ ኃጢአት ኢሠመርከ። ውእቱ ጊዜ እቤ ነየ መጻእኩ፤
፲፩ ውስተ ርእሰ መጽሐፍ ተጽሕፈ በእንቲአየ። ከመ እንግር ፈቃደከ መከርኩ አምላኪየ፤ ወሕግከኒ በማእከለ ከርሥየ።
፲፪ ዜነውኩ ጽድቀ በማኅበር ዐቢይ ናሁ ኢከላእኩ ከናፍርየ፤ እግዚኦ ለሊከ ታአምር ጽድቅየ።
፲፫ ኢኀባእኩ ውስተ ልብየ ርትዐከ፤ ወነገርኩ አድኅኖተከ፤
፲፬ ወኢሰወርኩ ሣህለከ ወምሕረትከ እማኅበር ዐቢይ።
፲፭ አንተ እግዚኦ ኢታርሕቅ ሣህለከ እምኔየ፤ ምሕረትከ ወጽድቅከ ዘልፈ ይርከባኒ።
፲፮ እስመ ረከበተኒ እኪት እንተ አልባቲ ኈልቈ ወተራከባኒ ኃጣውእየ ወስእንኩ ነጽሮ፤
፲፯ ወበዝኃ እምሥዕርተ ርእስየ፤ ልብየኒ ኀደገኒ።
፲፰ ሥመር እግዚኦ ከመ ታድኅነኒ፤ እግዚኦ ነጽር ውስተ ረዲኦትየ።
፲፱ ይትኀፈሩ ወይኅሰሩ ኅቡረ እለ ይፈቅዱ ያእትትዋ ለነፍስየ
፳ ለይግብኡ ድኅሬሆሙ ወይትኀፈሩ እለ ይፈቅዱ ሊተ እኩየ።
፳፩ ወይትፈደዩ በጊዜሃ ኀሳሮሙ፤ እለ ይብሉኒ እንቋዕ እንቋዕ።
፳፪ ለይትፈሥሑ ወይትሐሰዩ ብከ ኵሎሙ እለ የኀሡከ እግዚኦ። ወይበሉ ዘልፈ ዐቢይ እግዚአብሔር፤ እለ ይፈቅዱ አድኀኖተከ በኵሉ ጊዜ።
፳፫ አንሰ ነዳይ ወምስኪን እነ ወእግዚአብሔር ይሔሊ ሊተ፤
፳፬ ረዳእየ ወመድኀንየ አንተ አምላኪየ ወኢትጐንዲ።