መዝሙር 50
መዝሙራት ዘዳዊት ምዕራፍ ፶ ፍጻሜ ዘደቂቀ ቆሬ መዝሙር ዘአሳፍ።
፩ አምላከ አማልክት እግዚአብሔር ነበበ ወጸውዓ ለምድር፤
፪ እምሥራቀ ፀሓይ እስከነ ዐረብ። ወእምጽዮን ሥነ ስብሐቲሁ
፫ እግዚአብሔርሰ ገሀደ ይመጽእ ወአምላክነሂ ኢያረምም፤
፬ እሳት ይነድድ ቅድሜሁ ወዐውድዶሂ ዐውሎ ብዙኅ።
፭ ይጼውዓ ለሰማይ በላዕሉ፤ ወለምድርኒ ከመ ይኰንን ሕዝቦ።
፮ አስተጋብኡ ሎቱ ጻድቃኑ፤ እለ ይገብሩ መሥዋዕተ ዘበሕጉ።
፯ ይነግራ ሰማያት ጽድቀ ዚአሁ፤ እስመ እግዚአብሔር መኰንን ውእቱ።
፰ ስምዐኒ ሕዝብየ ወእንግርከ እስራኤል ወኣሰምዕ ለከ፤ አምላክከሰ አምላክ አነ ውእቱ።
፱ አኮ በእንተ መሥዋዕትከ ዘእዛለፈከ፤ ወቍርባንከኒ ቅድሜየ ውእቱ በኵሉ ጊዜ።
፲ ኢይነሥእ አልህምተ እምቤትከ፤ ወኢሐራጊት እመርዔትከ።
፲፩ እስመ ዚአየ ውእቱ ኵሉ አራዊት ዘገዳም፤ እንስሳ ገዳምኒ ወአልህምት።
፲፪ ወኣአምር ኵሎ አዕዋፈ ሰማይ፤ ወሥነ ገዳምኒ ኀቤየ ሀሎ።
፲፫ እመኒ ርኀብኩ ኢይስእለከ፤ እስመ ዚአየ ውእቱ ኵሉ ዓለም በምልኡ።
፲፬ ኢይበልዕ ሥጋ ላህም፤ ወኢይሰቲ ደመ ጠሊ።
፲፭ ሡዕ ለእግዚአብሔር መሥዋዕተ ስብሐት፤ ወሀቦ ለልዑል ጸሎተከ።
፲፮ ትጼውዐኒ በዕለተ መንዳቤከ ኣድኅነከ ወታአኵተኒ።
፲፯ ወለኃጥእሰ ይቤሎ እግዚአብሔር ለምንት ለከ ትነግር ሕግየ፤ ወትነሥእ በአፉከ ሥርዕትየ።
፲፰ ወአንተሰ ጸላእከ ተግሣጽየ፤ ወአግባእከ ድኅሬከ ቃልየ።
፲፱ እመኒ ርኢከ ሰራቄ ትረውጽ ምስሌሁ፤ ወረሰይከ መክፈልተከ ምስለ ዘማውያን።
፳ አፉከ አብዝኃ ለእኪት፤ ወልሳንከ ፀፈራ ለሕብል።
፳፩ ትነብር ወተሐምዮ ለእኁከ፤ ወአንበርከ ዕቅፍተ ለወልደ እምከ። ዝንተ ገቢረክ አርመምኩ ለከ
፳፪ አደመተከኒ ኀጢአት ሐዘብከኑ እኩን ከማከ፤ እዛለፍከኑ ወእቁም ቅድመ ገጽከ።
፳፫ ለብዉ ዘንተ፤ ኵልክሙ እለ ትረስዕዎ ለእግዚአብሔር፤ ወእመአኮሰ ይመስጥ ወአልቦ ዘያድኅን።
፳፬ መሥዋዕት ክብርት ትሴብሐኒ፤ ህየ ፍኖት እንተ ባቲ አርአየ እግዚአብሔር አድኅኖቶ።