መዝሙር 58
መዝሙራት ዘዳዊት ምዕራፍ ፶፰ ፍጻሜ ኢታማስን ዘዳዊት አርአያ መጽሐፍ።
፩ እመሰ አማን ጽድቀ ትነቡ፤ ወርትዐ ትኴንኑ ደቂቀ እጓለ እምሕያው።
፪ እስመ በልብክሙ ኃጢአተ ትገብሩ በዲበ ምድር፤ ወጽልሑተ ይፀፍራ እደዊክሙ።
፫ ተነክሩ ኃጥኣን እማሕፀን፤ እምከርሥ ስሕቱ ወነበቡ ሐሰተ።
፬ ወመዐቶሙኒ ከመ ሕምዘ አርዌ ምድር፤ ከመ አርዌ ምድር ጽምምት እዘኒሃ።
፭ እንት ኢትሰምዕ ቃለ ዘይሬቅያ፤ እንዘ ይሠርያ መሠርይ ጠቢብ።
፮ እግዚአብሔር ይሰብር ስነኒሆሙ በውስተ አፉሆሙ፤ ወይሰብር እግዚአብሔር ጥረሲሆሙ ለአናብስት።
፯ ወየኀስሩ ከመ ማይ ዘይትከዐው፤ ወይዌስቅ ቀስቶ እስከ ያደክዎሙ።
፰ ወየኀልቁ ከመ ሰምዕ ዘይትመሰው፤ ወድቀት እሳት ወኢርኢክዋ ለፀሐይ።
፱ ዘእንበለ ይትዐወቅ ሦክክሙ ሕለተ ኮነ ከመ ሕያዋን በመዐቱ ይውኅጠክሙ።
፲ ይትፌሣሕ ጻድቅ ሶበ ይሬኢ በቀለ፤ ወይትኀፀብ እዴሁ በደመ ኃጥእ።
፲፩ ወይብል ሰብእ ቦኑ እንጋ ፍሬ ለጻድቅ፤ ወቦኑ እንጋ እግዚአብሔር ይፈትሕ ሎሙ በዲበ ምድር።