መዝሙር 74
መዝሙራት ዘዳዊት ምዕራፍ ፸፬ ዘበኣእምሮ ዘአሳፍ።
፩ ለምንት ገደፍከኒ እግዚኦ ለዝሉፉ፤ ወተመዓዕከ መዐተከ ላዕለ አባግዐ መርዔትከ።
፪ ተዘከር ማኅበረከ ዘአቅደምከ ፈጢረ
፫ ወአድኀንከ በትረ ርስትከ፤ ደብረ ጽዮን ዘኀደርከ ውስቴታ።
፬ አንሥእ እዴከ ዲበ ትዕቢቶሙ ለዝሉፉ፤ መጠነከ አሕሠመ ፀራዊ ዲበ ቅዱሳኒከ።
፭ ወተዘሀሩ ጸላእትከ በማእከለ በዓልከ፤
፮ ወረሰዩ ትእምርቶሙ ትእምርተ ዘኢያአምሩ። ከመ ዘውስተ ላዕላይ ፍኖት፤
፯ ወከመ ዕፀወ ገዳም በጕድብ ሰበሩ ኆኃቲሃ። ከማሁ በማሕፄ ወበመፍጽሕ ሰበርዋ።
፰ ወአውዐዩ በእሳት መቅደሰከ፤ ወአርኰሱ ማኅደረ ስምከ ውስተ ምድር።
፱ ወይቤሉ በልቦሙ ኀቢሮሙ በበሕዘቢሆሙ፤ ንዑ ንስዐር ኵሎ በዓላቲሁ ለእግዚአብሔር እምድር።
፲ ወትእምርቶሂ ኢናአምር፤ ወአልቦ እንከ ነቢየ፤ ወንሕነሂ ኢናአምር እንከ።
፲፩ እስከ ማእዜኑ እንከ እግዚኦ ይጼእል ፀራዊ፤ ወዘልፈ ያምዕዖ ለስምከ ጸላኢ።
፲፪ ለምንት እግዚኦ ትመይጥ እዴከ፤ ወየማንከ ማእከለ ሕፅንከ ለግሙራ።
፲፫ ወእግዚአብሔር ንጉሥ ውእቱ እምቅድመ ዓለም፤ ወገብረ መድኀኒተ በማእከለ ምድር።
፲፬ አንተ አጽናዕካ ለባሕር በኀይልከ፤ አንተ ሰበርከ ርእሰ ከይሲ በውስተ ማይ።
፲፭ ወአንተ ቀጥቀጥከ አርእስቲሁ ለከይሲ፤ ወወሀብኮሙ ሲሳዮሙ ለሕዝበ ኢትዮጵያ።
፲፮ አንተ ሰጠቀ አፍላገ ወአንቅዕት፤
አንተ ኢይበስኮሙ ለአፍላገ ኤታም።
፲፯ ለከ ውእቱ መዐልት ወዚአከ ይእቲ ሌሊት፤ አንተ ፈጠርከ ፀሐየ ወወርኀ።
፲፰ ወአንተ ገበርከ አድባረ ወምድረ ኵሎ፤ ክረምተ ወሐጋየ አንተ ፈጠርከ።
፲፱ ወተዘከር ዘንተ ተግባረከ፤ ፀራዊ ተዐየሮ ለእግዚአብሔር፤ ወሕዝብ አብድ አምዕዖ ለስሙ።
፳ ኢትመጥዋ ለአራዊት ነፍሰ እንተ ትገኒ ለከ፤ ወኢትርሳዕ ነፍሰ ነዳያኒከ ለዝሉፉ።
፳፩ ወነጽር ውስተ ሥርዐትከ፤ እስመ በዝኁ ጽሉማነ ምድር አብያተ ኃጥኣን።
፳፪ ወኢይግባእ ነዳይ ተኀፊሮ፤ ንዳይ ወምስኪን ይሴብሑ ለስምከ።
፳፫ ተንሥእ እግዚኦ ወተበቀል በቀልየ፤ ወተዘከር ዘተዐየሩከ አብዳን ኵሎ አሚረ።
፳፬ ወኢትርሳዕ ቃለ አግብርቲከ፤ ትዝህርቶሙ ለጸላእትከ ይዕረግ ኀቤከ በኵሉ ጊዜ።