መዝሙር 89
መዝሙራት ዘዳዊት ምዕራፍ ፹፱ ዘበኣእምሮ ኤታን እስራኤላዊ።
፩ ምሕረተከ እሴብሕ እግዚኦ ለዓለም፤
፪ ወእዜኑ ጽድቀከ በአፉየ ለትውልደ ትውልድ።
፫ እስመ ትቤ ለዓለም አሐንጽ ምሕረተ፤ በሰማይ ጸንዐ ጽድቅከ።
፬ ኪዳነ ተካየድኩ ምስለ ኅሩያንየ፤ ወመሐልኩ ለዳዊት ገብርየ። ለዓለም አስተዴሉ ዘርዐከ፤
፭ ወአሐንጽ ለትውልደ ትውልድ መንበረከ።
፮ ይገንያ ሰማያት ለስብሐቲከ እግዚኦ፤ ወጽድቅከኒ በማኅበረ ቅዱሳን።
፯ መኑ ይትዔረዮ ለእግዚአብሔር በደመናት፤ ወመኑ ይመስሎ ለእግዚአብሔር እምደቂቀ አማልክት።
፰ እግዚአብሔር ስቡሕ በምክረ ቅዱሳን፤ ዐቢይ ወግሩም ዲበ ኵሎሙ እለ ዐውዱ።
፱ እግዚኦ አምላከ ኀያለን መኑ ከማከ፤ ኀያል እንተ እግዚኦ ወጽድቅ የዐውደከ።
፲ አንተ ትኴንን ኀይለ ባሕር፤ ወአንተ ታረሞ ለድምፀ ማዕበላ።
፲፩ አንተ አኅሰርኮ ለዕቡይ ከመ ቅቱል፤ ወበመዝራዕተ ኀይልከ ዘረውኮሙ ለፀርከ።
፲፪ ዚአከ ውእቱ ሰማያት ወእንቲአከ ይእቲ ምድር፤ ወዓለመኒ በምልኡ አንተ ሳረርከ። ባሕረ ወመስዐ አንተ ፈጠርከ።
፲፫ ታቦር ወአርሞንኤም በስመ ዚአከ ይትፌሥሑ ወይሴብሑ ለስምከ። መዝራዕትከ ምስለ ኀይል፤
፲፬ ጸንዐት እዴከ ወተለዐለት የማንከ። ፍትሕ ወርትዕ ተድላ መንበርከ፤
፲፭ ሣህል ወጽድቅ የሐውር ቅድመ ገጽከ። ብፁዕ ሕዝብ ዘያአምር የብቦ።
፲፮ እግዚኦ በብርሃበ ገጽከ የሐውሩ፤ ወበስምከ ይትፌሥሑ ኵሎ አሚረ፤ ወበጽድቅከ ይትሌዐሉ።
፲፯ እስመ ምክሐ ኀይሎሙ እንተ፤ ወበሣህልከ ይትሌዐል ቀርንነ።
፲፰ እስመ ዘእግዚአብሔር ረድኤትነ፤ ወቅዱሰ እስራኤል ንጉሥነ።
፲፱ ውእቱ አሚረ ተናገርኮሙ በራእይ ለደቂቅከ፤ ወትቤ እሬሲ ረድኤተ በላዕለ ኀይል ወአልዐልኩ ኅሩየ እምሕዝብየ።
፳ ወረከብክዎ ለዳዊት ገብርየ፤ ወቀባእክዎ ቅብአ ቅዱሰ።
፳፩ እስመ እዴየ ትረድኦ፤ ወመዝራዕትየ ታጸንዖ።
፳፪ ኢይብቍዕ ጸላኢ በላዕሌሁ፤ ወውሉድ ዐመፃ ኢይደግም አሕምሞቶ።
፳፫ ወእምትሮሙ ለፀሩ እምቅድመ ገጹ፤ ወኣኅስሮሙ ለጸላእቱ።
፳፬ ወሣህልየሰ ወጽድቅየ ምስሌሁ፤ ወበስምየ ይትሌዐል ቀርኑ።
፳፭ ወእሠይም ውስተ ባሕር እዴሁ፤ ወውስተ አፍላግ የማኖ።
፳፮ ውእቱ ይብለኒ አቡየ አንተ፤ አምላኪየ ወረዳእየ ወመድኀንየ።
፳፯ ወአነሂ በኵርየ እሬስዮ፤ ወልዑል እምነገሥተ ምድር።
፳፰ ወለዓለም አዐቅብ ሎቱ ሣህልየ፤ ወምእመን ውእቱ ለኪዳንየ።
፳፱ ወእሬሲ ዘርዖ ለዓለመ ዓለም፤ ወመንበሮሂ ከመ መዋዕለ ሰማይ።
፴ ወእመሰ ኀደጉ ደቂቁ ሕግየ፤ ወኢሖሩ በኵነኔየ።
፴፩ ወእመሂ አርኰሱ ሥርዐትየ፤ ወኢዐቀቡ ትእዛዝየ።
፴፪ እዋሕያ በበትር ለኀጢአቶሙ፤ ወበመቅሠፍት ለአበሳሆሙ።
፴፫ ወሣህልየሰ ኢይበልእ እምኔሆሙ፤ ወኢይዔምፅ በጸድቅየ።
፴፬ ወኢያረኵስ ኪዳንየ፤ ወኢይሔሱ ዘወፅአ እምአፉየ።
፴፭ ምዕረ መሐልኩ በቅዱስየ፤ ከመ ለዳዊት ኢይሔስዎ። ወዘርዑሂ ለዓለም ይሄሉ፤
፴፮ ወመንበሩሂ ከመ ፀሐይ በቅድሜየ። ወሥሩዕ ከመ ወርኅ ለዓለም፤ ወስምዑሂ ምእመን በሰማይ።
፴፯ ወአንተሰ መነንኮ ወገደፍኮ፤ ወአናሕሰይኮ ለመሲሕከ።
፴፰ ወሜጥከ ሥርዐቶ ለገብርከ፤ ወአርኰስከ ውስተ ምድር መቅደሶ።
፴፱ ወነሠትከ ኵሎ ጥቅሞ፤ ወረሰይከ አጽዋኒሁ መፍርሀ።
፵ ወተማሰጦ ኵሉ ኀላፌ ፍኖት፤ ወኮነ ጽእለተ ለጎሩ።
፵፩ ወአልዐልከ የማነ ፀሩ፤ ወአስተፈሣሕከ ኵሎ ጸላእቱ።
፵፪ ወሜጥከ ረድኤተ ኲናቱ፤ ወኢተወከፍኮ በውስተ ፀብእ።
፵፫ ወሰዐርኮ እምንጽሑ፤ ወነፃሕከ ውስተ ምድር መንበሮ።
፵፬ ወአውኀድከ መዋዕለ መንበሩ፤ ወሶጥከ ላዕሌሁ ኀፍረተ።
፵፭ እስከ ማእዜኑ እግዚኦ ትትመየጥ ለግሙራ፤ ወይነድድ ከመ እሳት መዐትከ።
፵፮ ተዘከር ምንት ውእቱ ኀይልየ፤ ቦኑ ለከንቱ ፈጠርኮ ለኵሉ እጓለ እመሕያው።
፵፯ መኑ ሰብእ ዘየሐዩ ወኢይሬእዮ ለሞት፤ ወመኑ ዘያድኅና ለነፍሱ እምእደ ሲኦል።
፵፰ አይቴ ውእቱ ዘትካት ሣህልከ እግዚኦ፤ ዘመሐልከ ለዳዊት ገብርከ በጽድቅ።
፵፱ ተዘከር እግዚኦ ዘጸአልዎሙ ለአግብርቲከ፤ ዘተወከፍኩ በሕፅንየ ብዙኀ አሕዛብ።
፶ ዘጸአሉ ጸላእትከ እግዚኦ፤ ወጸአሉ እብሬተ መሲሕከ።
፶፩ ይትባረክ እግዚአብሔር ለዓለም፤ ለይኩን ለይኩን።