መዝሙር 91
መዝሙራት ዘዳዊት ምዕራፍ ፺፩ ስብሐት ማኅሌት ዘዳዊት።
፩ ዘየኀድር በረድኤተ ልዑል፤ ወይነብር ውስተ ጽላሎቱ ለአምላከ ሰማይ።
፪ ይብሎ ለእግዚአብሔር ምስካይየ ወጸወንየ አንተ፤ አምላኪየ ወረዳእየ ወእትዌከል ቦቱ።
፫ እስመ ውእቱ ይባልሐኒ እመሥገርት ነዓዊት፤ ወእምነገር መደንግፅ።
፬ ይጼልለከ በገበዋቲሁ ወትትዌከል በታሕተ ክነፊሁ፤
፭ ጽድቅ በወልታ የዐውደከ። ወኢትፈርህ እምግርማ ሌሊት፤
፮ እምሐጽ ዘይሠርር በመዐልት። እምግብር ዘየሐውር በጽልመት፤ እምጽድቅ ወእምጋኔነ ቀትር።
፯ ይወድቁ በገቦከ ዐሠርቱ ምእት ወኣእላፍ በየማንከ፤ ወኀቤከሰ ኢይቀርቡ።
፰ ወባሕቱ ትሬኢ በኣዕይንቲከ፤ ወትሬኢ ፍዳሆሙ ለኃጥኣን።
፱ እስመ አንተ እግዚኦ ተስፋየ፤ ልዑል ረሰይከ ጸወነከ።
፲ ኢይቀርብ እኩይ ኀቤከ፤ ወኢይበውእ መቅሠፍት ቤተከ።
፲፩ እስመ ለመላእክቲሁ ይኤዝዞሙ በእንቲአከ፤ ከመ ይዕቀቡከ በኵሉ ፍናዊከ።
፲፪ ወበእደው ያነሥኡከ፤ ከመ ኢትትዐቀፍ በእብን እግረከ።
፲፫ ላዕለ ተኵላ ወከይሲ ትጼዐን፤ ወትከይድ አንበሳ ወከይሴ።
፲፬ እስመ ብየ ተወከለ ወኣድኅኖ፤ ወእከድኖ እስመ ኣእመረ ስምየ።
፲፭ ይጼውዐኒ ወእሰጠዎ ሀሎኩ ምስሌሁ አመ ምንዳቤሁ፤ ኣድኅኖ ወእሰብሖ።
፲፮ ለነዋኅ መዋዕል ኣጸግቦ፤ ወኣርእዮ አድኅኖትየ።