መዝሙር 96
መዝሙራት ዘዳዊት ምዕራፍ ፺፮ ዘአመ ተሐንጸ ቤት ዘእምድኅረ ፂዋዌ፤ ማኅሌት ዘዳዊት።
፩ ሰብሕዎ ለእግዚአብሔር ስብሐተ ሐዲሰ፤ ሰብሕዎ ለእግዚአብሔር ኵላ ምድር።
፪ ሰብሕዎ ለእግዚአብሔር ወባርኩ ለስሙ፤ ወተዘያነዉ እምዕለት ዕለተ አድኅኖቶ።
፫ ወንግርዎሙ ለአሕዛብ ስብሐቲሁ፤ ወለኵሎሙ አሕዛብ ተኣምሪሁ።
፬ እስመ ዐቢይ እግዚአብሔር ወብዙኅ አኰቴቱ፤ ወግሩም ውእቱ ላዕለ ኵሉ አማልክት።
፭ እስመ አማልክተ አሕዛብ አጋንንት፤ ወእግዚአብሔርሰ ሰማያተ ገብረ።
፮ አሚን ወሠናይት ቅድሜሁ፤ ቅድሳት ወዕበየ ስብሐት ውስተ መቅደሱ።
፯ አምጽኡ ለእግዚአብሔር በሓውርተ አሕዛብ፤ አምጽኡ ለእግዚአብሔር ክብረ ወስብሓተ። አምጽኡ ለእግዚአብሔር ስብሐተ ለስሙ፤
፰ ንሥኡ መሥዋዕተ ወባኡ ውስተ አዕጻዲሁ። ስግዱ ለእግዚአብሔር በዐጸደ መቅደሱ፤
፱ ታድለቀልቅ እምቅድመ ገጹ ኵላ ምድር። በልዎሙ ለኣሕዛብ ከመ እግዚአብሔር ነግሠ
፲ ወአጽንዓ ለዓለም ከመ ኢታንቀልቅል፤ ወይኴንኖሙ ለአሕዛብ በርትዕ።
፲፩ ይትፌሥሓ ሰማያት ወትትሐሠይ ምድር፤ ወትትከወስ ባሕር በምልኣ። ትትሐሠይ ገዳም ወኵሉ ዘውስቴታ፤
፲፪ ውእቱ አሚረ ይትፌሥሑ ኵሉ ዕፀወ ገዳም። እምቅድመ ገጹ ለእግዚአብሔር እስመ ይመጽእ ወይመጽእ ወይኴንና ለምድር፤
፲፫ ወይኴንና ለዓለም በጽድቅ ወለአሕዛብኒ በርትዕ።