መዝሙር 99
መዝሙራት ዘዳዊት ምዕራፍ ፺፱ መዝሙር ዘዳዊት።
፩ እግዚአብሔር ነግሠ ደንገፁ አሕዛብ፤ ዘይነብር ዲበ ኪሩቤል አድለቅለቃ ለምድር።
፪ እግዚአብሔር ዐቢይ በጽዮን፤ ወልዑል ውእቱ ላዕለ ኵሉ አሕዛብ።
፫ ኵሉ ይገኒ ለስምከ ዐቢይ፤ እስመ ግሩም ወቅዱስ ውእቱ። ክቡር ንጉሥ ፍትሐ ያፈቅር፤
፬ አንተ አጽናዕካ ለጽድቅ ፍትሐ ወጽድቀ ለያዕቆብ አንተ ገበርከ።
፭ ተለዐለ እግዚአብሔር ፈጣሪነ ወይሰግዱ ሎቱ ታሕተ መከየደ እገሪሁ፤
፮ እስመ ቅዱሳን እሙንቱ። ሙሴ ወአሮን በክህነቶሙ ወሳሙኤልኒ ምስለ እለ ይጼውዑ ስሞ፤
፯ ይጼውዕዎ ለእግዚአብሔር ወውእቱኒ ይሰጠዎሙ። ወይትናገሮሙ በዐምደ ደመና፤
፰ ወየዐቅቡ ስምዖ ወትእዛዞሂ ዘወሀቦሙ።
፱ እግዚኦ አምላክነ አንተ ሰማዕኮሙ፤ እግዚኦ አንተ ተሣህልኮሙ ወትትቤቀል በኵሉ ምግባሮሙ።
፲ ተለዐለ እግዚአብሔር አምላክነ ወይሰግዱ ሎቱ ውስተ ደብረ መቅደሱ፤ እስመ ቅዱስ ውእቱ እግዚአብሔር አምላክነ።