መዝሙር 104
መዝሙራት ዘዳዊት ምዕራፍ ፻፬ ዘዳዊት።
፩ ትባርኮ ነፍስየ ለእግዚአብሔር። እግዚኦ አምላኪየ ጥቀ ዐበይከ ፈድፋደ፤
፪ አሚነ ወዕበየ ስብሐት ለበስከ። ወለበስከ ብርሃነ ከመ ልብስ፤
፫ ወረበብኮ ለሰማይ ከመ ሠቅ።
፬ ዘይጠፍር በማይ ጽርሖ ወረሰየ ደመና መከየዶ፤ ዘየሐውር በክነፈ ነፋስ።
፭ ዘይሬስዮሙ ለመላእክቲሁ መንፈሰ፤ ወለእለ ይትለአክዎ ነደ እሳት።
፮ ሳረራ ለምድር ወአጽንዓ፤ ከመ ኢታንቀልቅል ለዓለመ ዓለም።
፯ ወቀላይኒ ከመ ልብስ ዐጽፋ፤ ውስተ አድባር ይቀውሙ ማያት።
፰ ወእምተግሣጽከ ይጐዩ፤ ወእምድምፀ ነጐድጓድከ ይደነግፁ።
፱ የዐርጉ አድባረ ወይወርዱ ገዳመ፤ ውስተ ብሔር ኀበ ሳረርኮሙ።
፲ ወሠራዕኮሙ ወሰኖሙ እምኀበ ኢየኀልፉ፤ ከመ ኢይትመየጡ ወኢይክድንዋ ለምድር።
፲፩ ዘይፌኑ አንቅዕተ ውስተ ቈላት፤ ማእከለ አድባር የኀልፉ ማየት።
፲፪ ወያሰትዩ ለኵሉ አርዌ ገዳም፤ ወይትወክፉ ሐለስትዮታት ለጽምኦሙ።
፲፫ ወያጸሉ ህየ አዕዋፈ ሰማይ፤ ወይነቅዉ በማእከለ ጾላዓት።
፲፬ ዘይሰቅዮሙ ለአድባር እምውሳጥያቲሆሙ፤ እምፍሬ ተግባርከ ትጸግብ ምድር።
፲፭ ዘያበቍል ሣዕረ ለእንስሳ ወኀመልማለ ለቅኔ እጓለ እመሕያው፤
፲፮ ከመ ያውፅእ እክለ እምድር። ወወይን ያስተፌሥሕ ልበ ሰብእ
፲፯ ወቅብእ ለአብርሆ ገጽ፤ ወእክል ያጸንዕ ኀይለ ሰብእ።
፲፰ ወይጸግቡ ዕፀወ ገዳም፤ አርዘ ሊባኖስ ዘተከልከ። ወበህየ ይትዋለዳ አዕዋፍ፤
፲፱ ወይትጋወሮን ቤተ ሄርድያኖስ። አድባር ነዋኃት ለሀየላት። ወጾላዓት ምጕያዮን ለግሔያት።
፳ ወገበርከ ወርኀ በዕድሜሁ፤ ፀሐይኒ አእመረ ምዕራቢሁ።
፳፩ ታመጽእ ጽልመተ ወይከውን ሌሊተ፤ ወይወፅኡ ቦቱ ኵሉ አርዌ ገዳም።
፳፪ እጕለ አናብስት ይጥሕሩ ወይመስጡ፤ ወይስእሉ ኀበ እግዚአብሔር ሲሳዮሙ።
፳፫ ወእምከመ ሠረቀ ፀሐይ የአትዉ፤ ወይውዕሉ ውስተ ግበቢሆሙ።
፳፬ ወይወፍር ሰብእ ውስተ ተግባሩ፤ ወይውዕል ወይትቀነይ እስከ ይመሲ።
፳፭ ጥቀ ዐቢይ ግብርከ እግዚኦ ወኵሎ በጥበብ ገበርከ፤ መልአ ምድር ዘፈጠርከ።
፳፮ ዛቲ ባሕር ዐባይ ወረሓብ፤ ህየ ዘይትሐወስ ዘአልቦ ኈልቁ
፳፯ እንስሳ ዐበይተ ምስለ ደቃቅ። ህየ ይሐውራ አሕማር፤
፳፰ ከይሲ ዘፈጠርከ ይሳለቅ ላዕሌሆሙ። ወኵሉ ይሴፎ ኀቤከ፤ አንተ ትሁቦሙ ሲሳዮሙ በበጊዜሁ።
፳፱ ወእምከመ ወሀብኮሙ ያስተጋብኡ፤ ወፈቲሕከ እዴከ ታጸግብ ለኵሉ እምሕረትከ።
፴ ወእመሰ ሜጥከ ገጸከ ይደነግፁ፤ ታወፅእ መንፈሶሙ ወየኀልቁ ወይገብኡ ውስተ መሬቶሙ።
፴፩ ወትፌኑ መንፈሰከ ወይትፈጠሩ፤ ወትሔድስ ገጻ ለምድር።
፴፪ ለይኩን ስብሐቲሁ ለእግዚአብሔር ለዓለም፤ ይትፌሣሕ እግዚአብሔር በተግባሩ።
፴፫ ዘይኔጽራ ለምድር ወይሬስያ ከመ ትርዐድ፤ ዘይገሶሙ ለአድባር ወይጠይሱ።
፴፬ እሴብሖ ለእግዚአብሔር በሕይወትየ፤ ወእዜምር ለአምላኪየ በአምጣነ ሀሎኩ።
፴፭ ወኣሠምሮ በቃልየ፤ ወአንሰ እትፌሣሕ በእግዚአብሔር።
፴፮ ወየኀልቁ ኃጥኣን እምድር ወአማፅያንሂ ኢይሄልዉ እንከ፤ ትባርኮ ነፍስየ ለእግዚአብሔር።